თბილისი მსოფლიოს ანტრეპრენერთა რჩეულ ქალაქებს შორის თუკი Movinga-ს მიერ ჩატარებულ გლობალურ კვლევას გადავხედავთ, კიდევ ერთხელ გავიაზრებთ, რომ საქართველო ანტრეპრენერულ რუკაზე დამსახურებლადაა აღნიშნული
By ანა ბიბილეიშვილი •
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
საქართველოს დედაქალაქი 2019 წლის საუკეთესო ანტრეპრენერული ქალაქების გვერდით მოხვდა. კვლევა, რომელიც გერმანულმა კომპანიამ ჩაატარა, მიზნად ისახავდა დაედგინა ანტრეპრენერთათვის მიმზიდველი ქალაქები, სადაც ისინი შეძლებდნენ როგორც ბიზნესის წამოწყებას, ისე სოციალური ურთიერთობების ადვილად წარმართვას.
კვლევის დასაწყისში შეარჩიეს 75 ქალაქი, რომელიც ანტრეპრენერული სულისკვეთებით, ბიზნესის ხელშეწყობითა და ეკონომიკური ზრდით გამოირჩეოდა. რადგან ინდუსტრიებს განსხვავებული მოთხოვნები აქვთ ინფრასტრუქტურის, კანონმდებლობისა და დაფინანსების გათვალისწინებით, კომპანია Movinga-მ კვლევის დროს ყურადღება გაამახვილა მხოლოდ რამდენიმე მათგანზე, ესენია: სარესტორნო საქმიანობა, ტექნოლოგიური სტარტაპები და იმპორტ/ექსპორტის ბიზნესი.
კვლევის მიხედვით, სარესტორნო საქმიანობის წარმატებით მართვის ინდიკატორებად განისაზღვრა უძრავ ქონებაზე ხელმისაწვდომობა, კვალიფიციური კადრებისა და ხარისხიანი ბაზრის არსებობა. ტექნოლოგიური სტარტაპების წინსვლა კი დაუკავშირდა როგორც ეკოსისტემასა და ნიჭიერი ადამიანების რაოდენობას, ისე ინვესტიციების შესაძლებლობას. ხოლო რაც შეეხება იმპორტ/ექსპორტის ბიზნესს, აქ გადამწყვეტ ფაქტორებად ადგილმდებარეობა და ძლიერი საერთაშორისო ვაჭრობის შეთანხმებები დასახელდა.
კვლევის დროს შეისწავლეს თითოეულ ქალაქში ანტრეპრენერული ეკოსისტემა: საქმიანობის დასაწყებად საჭირო ხარჯების დათვლა, ქალი ბიზნესმენების შესაძლებლობების განსაზღვრა და ტიპური დროის ინტერვალი, რაც ახალი საქმიანობის დასაწყებადაა საჭირო. შემდგომ, კი მკვლევრებმა შეაფასეს ბიზნესის დასაწყებად საჭირო ელემენტები, რომლებიც მოიცავდა უძრავი ქონების ფასსა და სტუმართმოყვარე გარემოს არსებობას, სარისკო კაპიტალს, მნიშვნელოვანი ინდუსტრიების არსებობასა და ლოგისტიკის ხარჯებს.
Results for Tbilisi, Georgia | |||||
Restaurant Rank | Tech/Digital Venture Rank | Import/Export Rank | Incorporation Costs (USD) | Days Required to Set up a Business | Female Entrepreneur Score |
49 | 75 | 75 | 83 | 2 | 75.8 |
წყარო: https://www.movinga.de/en/cities-of-opportunity-for-entrepreneurs
Movinga-ს მიერ ჩატარებული კვლევის ანალიზის შედეგად დადგინდა, რომ სარესტორნო ბიზნესის დასაწყებად ლისაბონი საუკეთესო ქალაქია. მას მოსდევს ბარსელონა და სტამბოლი. ტექნოლოგიური სტარტაპების ქალაქად კი სან-ფრანცისკო დასახელდა, თავისი აყვავებული ციფრული ეკოსისტემითა და ტალანტების დიდი რაოდენობით. შემდეგ ადგილებს ლონდონი და ნიუ-იორკი დასჯერდნენ. იმპორტ/ექსპორტის ბიზნესით დაინტერესებულთათვის კი ყველაზე ხელსაყრელი ქალაქი სინგაპურია – კარგად ორგანიზებული ლოგისტიკური გარემოთი და ბაზარზე წვდომის საუცხოო შესაძლებლობებით. მეორე და მესამე ადგილები აქ ამსტერდამმა და შანხაიმ დაიკავეს.
თუკი ამ გლობალურ კვლევას გადავხედავთ, კიდევ ერთხელ გავიაზრებთ, რომ საქართველო ანტრეპრენერულ რუკაზე დამსახურებლადაა აღნიშნული – არსებული ინდუსტრიებიდან ყველაზე განვითარებული სარესტორნო საქმიანობაა. ამ კუთხით იგი 49-ე ადგილზეა, ხოლო რაც შეეხება ტექნოლოგიურ და იმპორტ/ექსპორტის ბიზნესს, თბილისი ამ ნიშნულით 75-ე ადგილს იკავებს. კვლევისას ყურადღება გამახვილდა ქალ ანტრეპრენერთა საქმიანობაზე, რომელთა შეფასება 75.8 ქულით მოხდა. მიღებული შედეგების ანალიზის მიხედვით, თბილისში ბიზნესის დასაწყებად სულ რაღაც 2 დღე და $83-ია საჭირო, რაც გვაძლევს შესაძლებლობას ვთქვათ, რომ საქართველოს დედაქალაქი სამართლიანად მიმზიდველია მსოფლიოს ანტრეპრენერებს შორის მისი უნიკალური ეკოსისტემის დამსახურებით, რომელიც უზრუნველყოფს არა მარტო ბიზნესის, არამედ სოციალური ურთიერთობების შენებას.
