ავტოდაზღვევა გასაგებ ენაზე - "თიბისი დაზღვევა" თიბისი დაზღვევა სიახლეების ძიებასა და მომხმარებელთან საერთო ენის გამონახვისათვის მუდმივ სწრაფვას არ წყვეტს

You're reading Entrepreneur Georgia, an international franchise of Entrepreneur Media.

თიბისი დაზღვევა

წლიდან წლამდე, საქართველოში სადაზღვევო სფეროს მიმართ ადამიანების კეთილგანწყობა სულ უფრო იზრდება, რაც დიდწილად, ისეთი კომპანიების დამსახურებაა, რომლებიც მომხმარებლისათვის მაქსიმალურად კომფორტული, გასაგები და გამჭვირვალე გარემოს შექმნაზე არიან ორიენტირებული. ერთ-ერთი ფლაგმანი, ბაზარზე დაზღვევის მიმართ ცნობიერებისა და ლოიალობის ამაღლებისათვის მუშაობაში, არის „თიბისი დაზღვევა", რომელიც 2016 წელს შეიქმნა და ორ წელიწადში ავტოდაზღვევის ბაზრის 30.4%-ის მოცვა, ასევე, ამ სფეროში მოწინავე ადგილის დაკავება მოახერხა − როგორც მომხმარებლისათვის ანაზღაურებული თანხის მოცულობით, ისე საცალო გაყიდვების კუთხითაც.

სულ ახლახან, თიბისი დაზღვევამ, სარეკლამო სააგენტო Windfor's-ის დახმარებით, ახალი კამპანია − ავტოდაზღვევა გასაგებ ენაზე, წამოიწყო, რომლის მიზანია ადამიანებს დაზღვევის სწორად გამოყენებაში, მაქსიმალური კომფორტის შექმნასა და უსიამოვნო მოულოდნელობების თავიდან არიდებაში დაეხმაროს. ამ მეგობრული ინიციატივით, კომპანიასა და მომხმარებელს შორის არსებული საერთო ენის, მარტივი და ადვილად აღქმადი საკომუნიკაციო ტონის, არა მარტო ყოველდღიურ ურთიერთობებზე, არამედ კონტრაქტებზე გავრცელებაცაა შესაძლებელი.

წარმატების მიუხედავად, თიბისი დაზღვევა სიახლეების ძიებასა და მომხმარებელთან საერთო ენის გამონახვისათვის მუდმივ სწრაფვას არ წყვეტს. ბრენდის მისიაა, გაამარტივოს ადამიანების ცხოვრება და მომხმარებელზე ორიენტირებული სერვისი დანერგოს და განავითაროს, რისთვისაც მნიშვნელოვანია ბაზარზე მომხმარებლის განწყობებისა და პრიორიტეტების სიღრმისეულად შესწავლა.

როგორც თიბისი დაზღვევის მიერ ჩატარებული კვლევები ადასტურებს, პროდუქტის ცნობადობის მიუხედავად, ადამიანების ნაწილს სადაზღვევო პირობებში გარკვევა დღემდე უჭირს, რაც მათ არასწორ მოლოდინს უქმნის და შემდგომი იმედგაცრუების მიზეზიც კი ხდება.

ქართული რეალობისათვის დამახასიათებელია ხელშეკრულებები, რომლებიც რთული წინადადებებით, ვიზუალურად გადატვირთული და ძნელად აღსაქმელი ტექსტებითაა გაჯერებული. ამის გამო, მომხმარებელი, ხშირად ისე აწერს კონტრაქტზე ხელს, რომ არც კი კითხულობს და მოგვიანებით აღმოაჩენს, რომ შეთანხმება მისთვის არცთუ ხელსაყრელ პირობებზე მოხდა. სწორედ ამ ტიპის ხარვეზების აღმოფხვრას ემსახურება თიბისი დაზღვევის კამპანია - ავტოდაზღვევა გასაგებ ენაზე, რომელიც ურთიერთობის ნებისმიერ ეტაპზე, მომხმარებელსა და კომპანიას შორის ნებისმიერ გაურკვევლობას მინიმუმამდე დაიყვანს და კომუნიკაციას მეტად გამჭვირვალესა და გასაგებს გახდის.

კომპანიის მომხმარებლის მიმართ დამოკიდებულებასთან, უშუალოდ ამ უპრეცედენტო ინიციატივასთან და თიბისი დაზღვევის სტრატეგიასთან დაკავშირებით მეტი ინფორმაციის მისაღებად, Entrepreneur თიბისი დაზღვევის გენერალური დირექტორის მოადგილეს, დავით კიღურაძეს გაესაუბრა.

„თიბისი დაზღვევამ ავტოტრანსპორტის დაზღვევის სფეროში ლიდერი პოზიცია 2018 წლიდან დაიკავა და დღემდე მყარად ინარჩუნებს ამ სტატუსს. მას შემდეგ, რაც კომპანიამ მომხმარებლის ნდობა მოიპოვა, ჩვენი ძირითადი საზრუნავი ამ ნდობის შენარჩუნება-გამართლება და კლიენტების კმაყოფილებაზე ფიქრი გახდა, რაც მომავალში კომპანიის ზრდის ერთ-ერთი განმსაზღვრელი ფაქტორი აღმოჩნდა. თიბისი დაზღვევის მისიაა ადამიანების ცხოვრების გამარტივება. ამ მიზნისკენ მიმავალ გზაზე კი მნიშვნელოვანია, რომ ყველა პროდუქტი, სერვისი, ან მათი თანმდევი ციფრული ტექნოლოგიები, იყოს მომხმარებელზე მორგებული: აღსაქმელად და მოსახმარად მარტივი, სწრაფი და ხარისხიანი.

კომპანიის სწრაფვა, გააუმჯობესოს თავისი მომსახურება და პროდუქტი, უპირველესად, კონკურენტული გარემოთი და თავად თიბისი დაზღვევის მიზნითა და კულტურითაა ნაკარნახევი. სადაზღვევო სფეროში ლიდერობის შესანარჩუნებლად, საჭიროა მუდმივად ვიზრუნოთ მომხმარებლისათვის მიწოდებული სერვისის სრულყოფაზე და პარალელურად, საზოგადოების პულსზე გვეჭიროს ხელი. კონკრეტულად, ავტოდაზღვევის პროდუქტის კუთხით, კომპანიამ ბევრი სიახლე დანერგა − დაიხვეწა პროდუქტის მახასიათებლები, გამარტივდა სადაზღვევო პოლისის შეძენის პროცესი და რაც ყველაზე მნიშვნელოვანია, დაჩქარდა და გაციფრულდა ზარალის ანაზღაურება, რაც კლიენტების კმაყოფილების ამაღლების, არსებული მომხმარებლის შენარჩუნებისა და ახალი აუდიტორიის მოზიდვის წინაპირობა გახდა.

თიბისი დაზღვევამ, კომპანიაში კლიენტზე ორიენტირებული, ე.წ. Customer-Centric კულტურა დანერგა, რომელიც მომხმარებელთან სხვადასხვა საკითხზე მუდმივ და აქტიურ უკუკავშირს ითვალისწინებს.

კლიენტებთან უშუალო ურთიერთობა და მათი აზრის გათვალისწინება ხდება სხვადასხვა ფორმით − ეს შეიძლება იყოს სმს-სატელეფონო კითხვარი ან ელექტრონული სახის კვლევა, რაც ამა თუ იმ პარამეტრის გაზომვაში გვეხმარება. ეს პროცესი გვაძლევს საშუალებას შევაფასოთ ჩვენი მუშაობა, გავიგოთ, რომელმა პროდუქტმა ან სერვისმა გაამართლა, ხოლო რომელში ვაწყდებით რაიმე სახის სირთულეს. ცხადია, მსგავსი ტიპის კვლევა უნდა ხდებოდეს არა მხოლოდ რომელიღაც კონკრეტულ ეტაპზე, არამედ კომპანიის ოპერირების სხვადასხვა სტადიაზე, როგორებიცაა პოლისის შეძენა, კონტრაქტის გაფორმება, შემდგომი მომსახურების მიღება, გზებზე ტექ-დახმარების აღმოჩენა და ყველაზე მთავარი − დამდგარი ზარალის კომპენსაცია.

Customer-centric მოდელი გვეხმარება, რომ უკეთ გავიცნოთ კლიენტი, მივხვდეთ, რა სჭირდებათ და რა მოლოდინი აქვთ; რა მოსწონთ და რით არ არიან საკმარისად კმაყოფილნი. ასევე, დავადგინოთ ის წერტილები, სადაც ჩვენი მომსახურების მიღებით, მომხმარებლის ცხოვრების გამარტივებაა შესაძლებელი.

ავტოდაზღვევის პირველ ეტაპზე, პოლისის შეძენის დროს, მნიშვნელოვანია კლიენტს რაც შეიძლება სრულყოფილად მივაწოდოთ ჩვენი პროდუქტის მახასიათებლები. რასაც მომხმარებელს ვუხსნით, მისთვის მარტივად აღქმადი და პროდუქტის შესახებ სწორი მოლოდინის შემქმნელი უნდა იყოს. სხვა ფინანსური ინსტიტუტების მსგავსად, თიბისი დაზღვევაც მომხმარებელთან ხელშეკრულებას აფორმებს, კონტრაქტის სახით, სადაც სადაზღვევო პირობებია გაწერილი, თუმცა ამ კუთხითაც, კლიენტები ხშირად უამრავ გაუგებრობას აწყდებიან.

კვლევები ადასტურებს, რომ დაზღვევის შესახებ მაღალი ცნობადობის მიუხედავად, მომხმარებელს მაინც უჭირს საფუძვლიანად გარკვევა, რაც მისი მხრიდან არასწორი მოლოდინის შექმნას განაპირობებს და შემდგომ იმედგაცრუების მიზეზიც ხდება. პრობლემის სათავე კი ის დოკუმენტებია, რომლითაც აქამდე მუშაობდა ავტოდაზღვევის ინდუსტრია. ეს დოკუმენტები უფრო სამართლებრივ და იურიდიულ ნაწილზე იყო მორგებული და კითხვადობის მხრივ მომხმარებლისთვის სირთულეს წარმოადგენდა. კონტრაქტები გაჯერებული იყო ტექნიკური და სამართლებრივი ტერმინოლოგიით, რომელთა ცოდნაზე წვდომა მხოლოდ ვიწრო სპეციალისტებს თუ ექნებათ. ამის გამო, გადავწყვიტეთ მიზნობრივ აუდიტორიას შევთავაზოთ − ავტოდაზღვევა გასაგებ ენაზე, მაქსიმალურად მიახლოებული ყოველდღიურ ენასთან, რათა ტექსტი სტილისტურად და შინაარსობრივად მარტივი და აღქმადი ყოფილიყო. დაზღვევის საწყის ეტაპებზე, კომპანიისათვის აუცილებელია მომხმარებელთან ერთ ტალღაზე ყოფნა და საერთო ენაზე საუბარი. ეს გვეხმარება ბარიერების დაძლევაში, გადაწყვეტილების მიღების პროცესის გამარტივებაში და პროდუქტის შესახებ სწორი მოლოდინის შექმნაში. ამიერიდან ნებისმიერ დაზღვეულს მკაფიოდ ეცოდინება, რისი ანაზღაურება ეკუთვნის და რისი − არა, რაც მეტ გამჭვირვალობას და საიმედოობას სძენს კომპანიასთან ურთიერთობას", გვიამბო თიბისი დაზღვევის გენერალური დირექტორის მოადგილემ, დავით კიღურაძემ.

რაც შეეხება თიბისი დაზღვევის საკომუნიკაციო სტრატეგიას, კამპანიის „ავტოდაზღვევა გასაგებ ენაზე" მთავარ ღირებულებებსა და ბიზნეს „ინსაითებს", რომელთა გარშემო გაჩნდა ამ ინიციატივის წამოჭრის იდეა, კომპანიის მარკეტინგისა და საზოგადოებასთან ურთიერთობის დეპარტამენტის უფროსი, თათია კარიაული გაგვაცნობს.

„როდესაც კომპანიას აქვს ამბიცია იყოს ბრენდი, მნიშვნელოვანია გაითვალისწინო, რომ ბრენდის მთავარი იდეა ღირებულების შექმნაა − მომხმარებლებისთვის, თანამშრომლებისთვის, დამფუძნებლებისთვის და, დღეს უკვე, მთლიანად საზოგადოებისთვის.

დროსთან ერთად, იცვლება მოთხოვნები − როგორც ბრენდების, ასევე რეკლამის მიმართაც. განსაკუთრებით დღეს, პანდემიის პერიოდში, წინ არის წამოწეული ემპათია. ბრენდის კომუნიკაციისას, სამიზნე აუდიტორიისთვის მხოლოდ ლამაზი კადრები ღირებული აღარაა. არც ის, რომ შენ ბაზარზე პირველი ხარ, თუ ამ პირველობით ახალ სტანდარტს და მიდგომებს არ ამკვიდრებ.

ახლა გადამწყვეტია, შენ, როგორც ბრენდს, რამდენად გესმის საკუთარი მომხმარებლების, რამდენად გაინტერესებდეს მათი აზრი და ის, თუ რას გრძნობენ. აუცილებელია, იცოდე, რა დროს და რატომ სჭირდებათ შენი პროდუქტი, რა სახის პრობლემას უწყვეტს და უგვარებს. წარმატების გარანტი აუცილებლად გახდება ის შეგრძნება და გამოცდილება, რომელსაც შენი მომსახურებით თუ უბრალოდ, კომუნიკაციით ტოვებ.

თანამედროვე ადამიანის მოთხოვნილებაა გრძნობდეს, რომ შენც, როგორც ბრენდს, შეგიძლია შეცდომების აღიარება, მათ შორის იმის თქმაც, რომ ჩვენი კონტრაქტი ძალიან რთული იყო. გვესმის, გეთანხმებით და ვმუშაობთ, ვცდილობთ, ვამარტივებთ. ჩვენი საკომუნიკაციო და ბიზნესსტრატეგიის ამოსავალი წერტილი სწორედ ემპათიაა − ადამიანების მოსმენა და მათთვის ისეთი გადაწყვეტების შეთავაზება, რაც ცხოვრებას გაუმარტივებთ.

თიბისი დაზღვევის ბრენდი თავიდანვე იმ იდეით შეიქმნა, რომ გაჯერებულ და კომპლექსურ სადაზღვევო ბაზარზე თავის სიტყვას იტყოდა, თამაშის საკუთარ წესებს შექმნიდა, რომელიც, უპირველეს ყოვლისა, ადამიანებისთვის იქნებოდა სასარგებლო. რაც ჩვენთვის ძალიან ორგანულია, ზოგადად, მთელი თიბისი ჯგუფი ერთი მისიის − ადამიანებისთვის ცხოვრების გამარტივების გარშემო ვერთიანდებით.

ჩვენი ბრენდის პირველი დიდი წარდგენა საზოგადოებასთან „შეცდომები მოსულას" კამპანიით მოხდა და ეს კულტურა, ალბათ განსაკუთრებულად გვეხმარება ახალ რეალობაში:

სწორედ ამან მოგვცა გასაქანი, ვიყოთ უფრო თამამები, არ გვეშინოდეს ექსპერიმენტების და პირადად მე, ეს ფრაზა დღემდე მეხმარება, რომ ჩემს გადაწყვეტილებებში შიშზე მეტად, სწავლის შესაძლებლობა დავინახო.

რაც აუცილებლად უნდა აღვნიშნო, არის ის, რომ ამ კამპანიაზე 6 თვეზე მეტია ვმუშაობთ. მთავარი „ინსაითი" ჩვენი მომხმარებლებიდან წამოვიდა. შიდა სამომხმარებლო კვლევის დახმარებით, უკეთ დავინახეთ მათი საჭიროებები და სურვილები, და საბოლოოდ, ყველა მიგნება ვთარგმნეთ, როგორც ადამიანებთან „ერთ ტალღაზე ყოფნა". ეს იყო მთავარი ინსაითი, რაზეც შემდეგ დავიწყეთ მუშაობა ავტოდაზღვევის კამპანიის მიმართულებით, სარეკლამო სააგენტო windfor's-თან ერთად.

რასაც დავამატებდი, ის არის, რომ ჩემთვის ამ პროცესში განსაკუთრებით სასიამოვნო გამოცდილებაა, როდესაც სწორი მიგნება გაქვს. ეს ხდება დიდი ინსპირაციის წყარო გუნდის შიგნითაც.

ჩვენს შემთხვევაში, კომპანიის შიგნით ძალიან ბევრი ადამიანი, სხვადასხვა დეპარტამენტიდან, რამდენიმე თვის განმავლობაში მუშაობდა, რათა მიზნად დასახული ცვლილებები რეალობად გვექცია. თითოეულ მათგანს სჯეროდა ამ ცვლილებების, ყველა ცოტა უფრო მეტს აკეთებდა, ვიდრე მოეთხოვებოდა, რამაც გუნდს მისცა ძალიან დიდი მუხტი. იმედი გვაქვს, რომ ეს შევძელით და მომხმარებლებისთვის რეალურ გამოცდილებაში გადავთარგმნეთ.

დაზღვევა კომპლექსური პროდუქტია და ეს მხოლოდ კიდევ ერთი წინგადადგმული ნაბიჯია, თუმცა, როგორც იტყვიან, გამოწვევა მიღებულია", − თათია კარიაული, თიბისი დაზღვევის მარკეტინგისა და საზოგადოებასთან ურთიერთობის დეპარტამენტის უფროსი

უშუალოდ თიბისი დაზღვევის ინიციატივაზე მუშაობის პროცესზე, კამპანიის სტრატეგიასა და ბიზნესინსაითების კამპანიის ინსაითებად გადათარგმნის მნიშვნელობაზე, Entrepreneur-ს სარეკლამო სააგენტო Windfor's-ის წარმომადგენლები: სტრატეგი მარიამ ჩხაიძე, სენიორ ქოფირაითერი ირინა საყვარელიძე და სენიორ არტდირექტორი მარიამ სუხიშვილი გაესაუბრნენ.

მარიამ ჩხაიძემ გაგვიზიარა, რომ თიბისი დაზღვევა 2018 წლიდან ბაზარზე ლიდერი კომპანია და მნიშვნელოვანი მოთამაშეა, თუმცა მიუხედავად ამისა, ბრენდის მთავარი გამოწვევა, ბაზარზე კომპანიის ავტოდაზღვევის პროდუქტის კიდევ უფრო მკაფიო პოზიციონირების ჩამოყალიბება იყო.

„მუშაობის პროცესში მნიშვნელოვანი მიგნება იყო ის, რომ ადამიანები ავტოდაზღვევის შერჩევისას ყველაზე ხშირად მეგობრების რეკომენდაციებს ენდობიან, ვინაიდან ისინი პირდაპირ, ადამიანურ, მათთვის გასაგებ ენაზე უხსნიან სადაზღვევო პირობებს და უყვებიან საკუთარ გამოცდილებაზე.

ასევე აღსანიშნავია, რომ სწორედ ამ ქცევით მომხმარებელი ცდილობს გაანეიტრალოს სადაზღვევო პირობებში გარკვევის სირთულეები და პროდუქტის თანმდევი შფოთვა − საჭირო დროს ანაზღაურებაზე უარის მიღება. შესაბამისად, როდესაც მან ზუსტად იცის კონტრაქტის პირობები, ქრება გაურკვევლობის შიში და გადაწყვეტილებებსაც უფრო მშვიდად იღებს.

ბრენდის როლიც სწორედ აქ დავინახეთ − თიბისი ავტოდაზღვევა, როგორც ყველაზე მარტივი და გულწრფელი დაზღვევა, იმ მეგობრად გვექცია, რომელიც გასაგებად ხსნის დაზღვევის პირობებს. აქედან მივედით სტრატეგიულ გადაწყვეტამდეც: თიბისი დაზღვევა დაუპირისპირდა ბუნდოვანებას და შემოიტანა სიცხადე დაზღვევაში", – Windfor's-ის სტრატეგი მარიამ ჩხაიძე.

შეკითხვებზე, თუ რატომაა ამ ინიციატივის მთავარი სათქმელი − „ავტოდაზღვევა გასაგებ ენაზე", და როგორ მივიდნენ ასეთ კრეატიულ გადაწყვეტამდე სააგენტოს გუნდის წევრები, Windfor's-ის სენიორ ქოფირაითერმა, ირინა საყვარელიძემ გვიპასუხა.

„კამპანიის კრეატიული გადაწყვეტა შემდეგ დაკვირვებაზე დაყრდნობით მოვიფიქრეთ − არავის უყვარს რთული და გაუგებარი ტექსტების კითხვა, მით უმეტეს − კონტრაქტების.

იდეების განხილვისას აღმოვაჩინეთ, რომ უმრავლესობა ჩვენგანს მნიშვნელოვან საბუთებზე ისე გვქონდა ხელი მოწერილი, არც კი წაგვიკითხავს ბოლომდე, ან ვერ გაგვიგია, რა ეწერა.

თავიდან ხუმრობით (მინდა აღვნიშნო, ხუმრობისას მოდის ხოლმე ძირითადად შემოქმედებითი გადაწყვეტები), შემდეგ კი სერიოზულად დავფიქრდით, შეგვექმნა ყველასთვის გასაგები კონტრაქტი.

რთული და გაუგებარი პუნქტები ყველასთვის გასაგებ ენაზე „ვთარგმნეთ". ასევე, შევქმენით სპეციალური, ყველასთვის გასაგები ფონტი Contractica, რომლის აღქმა ბევრად ადვილია. Contractica-ს გამოყენება ყველა მსურველს შეუძლია, რომ ნებისმიერი დოკუმენტი კიდევ უფრო გასაგები გახდეს.

ასე შეიქმნა პირველი, ყველაზე გასაგებ ენაზე დაწერილი კონტრაქტი", აღნიშნავს ირინა საყვარელიძე.

თუ რა კონკრეტული ინსტრუმენტებია გამოყენებული გამარტივებულ კონტრაქტში და რატომაა მნიშვნელოვანი დოკუმენტების მარტივი აღქმა თანამედროვე მომხმარებლისათვის, სარეკლამო სააგენტოს სენიორ არტდირექტორმა, მარიამ სუხიშვილმა გვიამბო.

„დღეს ყველაფერი სწრაფად იცვლება და მარტივდება, ამიტომ ბუნებრივია, რომ ისეთ კლასიკურ დოკუმენტსაც, როგორიც კონტრაქტია, გადახედვა და გადახალისება სჭირდება.

ამ დროს დიდი მნიშვნელობა ენიჭება ვიზუალურ მხარეს. დიზაინი უნდა გეხმარებოდეს, უფრო მოკლე დროში, უფრო მარტივად აღიქვა გრძელი წინადადებებისგან შემდგარი ტექსტი.

ახალი დიზაინის შექმნის პროცესში ყურადღება გავამახვილეთ ფონტის კითხვადობაზე, ზომასა და ხაზებს შორის დაშორებებზე, პუნქტები კი აბზაცებად დავახარისხეთ.

ასევე, უკეთესი კითხვადობისთვის სათაურები, ქვესათაურები და ძირითადი ტექსტი ერთმანეთისგან მნიშვნელოვნად გამოვყავით და რაც მთავარია, რთული ტერმინების ამხსნელი სპეციალური ილუსტრაციები შევქმენით − მკითხველი მათ ასე უფრო მარტივად დაიმახსოვრებს", − განაცხადა მარიამ სუხიშვილმა.

გარდა იმისა, რომ თიბისი დაზღვევა საკუთარ მომხმარებელთან კომუნიკაციის გამარტივებასა და კონტრაქტის მარტივად აღქმად დოკუმენტად პოზიციონირებაზე ზრუნავს, კომპანია აქტიურადაა ჩართული ამ საკითხის მიმართ საზოგადოებაში ცნობიერების ამაღლებაზე მუშაობაშიც.

რა არის ამ კამპანიის მთავარი მიზანი? − თიბისი დაზღვევის ინიციატივის მთავარი მამოძრავებელია, ქართველ მომხმარებელს ყველაზე კომპლექსური საკითხი ყველაზე გასაგებ ენაზე მიაწოდოს, რითაც კომპანიასა და დაზღვეულს შორის კიდევ უფრო გამჭვირვალე თანამშრომლობის საფუძველს ქმნის. ყველამ კარგად ვიცით, რომ ხელშეკრულება მნიშვნელოვანი დოკუმენტია, რომელიც ერთი მხრივ, საშუალებას გვაძლევს პროდუქტის შეძენისას სწორი გადაწყვეტილება მივიღოთ, ხოლო მეორე მხრივ, ამ მომსახურების შესახებ მაქსიმალურად მეტ ინფორმაციაზე გვქონდეს წვდომა. ამის მიუხედავად, კონტრაქტების სირთულე გვიბიძგებს, რომ წაუკითხავად მოვაწეროთ ხელი და დროთა განმავლობაში, არასათანადო ინფორმირებულობის გამო, უამრავი პრობლემის წინაშე აღმოვჩნდეთ.

თიბისი დაზღვევამ, როგორც ქართულ ბაზარზე ერთ-ერთმა ყველაზე მეგობრულმა და მომხმარებელზე ორიენტირებულმა ბრენდმა, თავის თავზე, შეიძლება ითქვას, ნოვატორული გადაწყვეტის დანერგვის მისია იტვირთა. კომპანიამ, ერთი შეხედვით, ხელშეუხებელი დოკუმენტი − კონტრაქტი, გაამარტივა, რადგან მოძველებული, რთულად აღსაქმელი ხელშეკრულების ნაცვლად, რომელსაც მომხმარებელი ვერ კითხულობდა, ახალი, გამარტივებული, გასაგები ალტერნატივის შექმნის აუცილებლობა დაინახა. ამ ინიციატივით, თიბისი დაზღვევამ მიზნად დაისახა, რომ ყველაზე ერთგვაროვანი, მოსაწყენი დოკუმენტი, ყველაზე კითხვადი და მარტივად აღსაქმელი გაეხადა, რასაც ვიმედოვნებთ, სხვა კომპანიებიც აიტაცებენ და ბიზნესურთიერთობები პრინციპულად ახალ საფეხურზე გადავა.

არჩილ გელაშვილი

Entrepreneur Staff

ჟურნალისტი, Entrepreneur Georgia

Business News

ჯანსაღი კვების რაციონი ნუცა სურგულაძის "ბალანსთან" ერთად

"ბალანსი" მომხმარებელს სთავაზობს კვების სერვისს, რომელშიც თითოეული კერძი სპეციალურადაა შერჩეული

ინსპირაცია

25 ფრაზა, რომლებმაც შემცვალეს

ხშირად ერთ ფრაზას ადამიანის მთელი ცხოვრების შეცვლა შეუძლია