ილონ მასკს Tesla-ს სათავო ოფისი კალიფორნიიდან ტექსასში გადააქვს
You're reading Entrepreneur Georgia, an international franchise of Entrepreneur Media.
კომპანია Tesla-ს, რომელიც „სილიკონ ველიზე" 2000-ანი წლების დასაწყისში დაფუძნდა, სათავო ოფისი ტექსასში გადააქვს, სადაც მასკი უკვე დიდი ხანია ცხოვრობს. ოფისის გადატანის მიუხედავად, ელექტრომანქანების მწარმოებელი, ავტომობილების სან-ფრანცისკოში აწყობას არ წყვეტს.
ილონ მასკმა ეს ინფორმაცია კომპანიის აქციონერებს 7 ოქტომბერს, უკვე ახალ საწარმოში გამართულ ყოველწლიურ შეხვედრაზე გააცნო, რომელიც ოსტინთან ახლოს მდებარეობს. მას არ დაუზუსტებია ზუსტი თარიღი, თუმცა პალო ალტოს ოფისის დატოვების გადაწყვეტილება არავისთვის ყოფილა მოულოდნელი.
გასულ წელს, კორონავირუსის გავრცელების საწყის ეტაპზე, კალიფორნიის ადგილობრივმა მთავრობამ შტატში საკმაოდ მძიმე შეზღუდვები დააწესა, რამაც გავლენა მსხვილ საწარმოებზეც იქონია. ამის შემდეგ, ილონ მასკი, რომლის შეხედულებების წლიდან წლამდე სულ უფრო ლიბერტარიანული ხდება, ქალაქ ოსტინში გადაბარგდა და Tesla-ს ოფისის ტექსასში გადატანაზე პირველი განცხადებებიც გააკეთა.
Tesla-ს საწარმო ოფიციალურად მიმდინარე წლის ბოლოსკენ ამოქმედდება.
„ჩვენ მივიჩნევთ, რომ ეს გონივრული სტრატეგიული ნაბიჯი იყო Tesla-სთვის, ვინაიდან კომპანია აფართოებს საკუთარ წარმომადგენლობას ოსტინში. 2022 წლისათვის, მოდელების - Cybertruck, Model 3, Model Y-ის წარმოების სიმძლავრეების გაორმაგებას და ტექსასის ბაზარზე ფეხის მოკიდებას გეგმავს", - აცხადებენ კომპანიაში.
„სილიკონ ველიზე" ოპერირების ძირითად გამოწვევებად, მასკმა კომპანიისათვის აუცილებელი სივრცეების არარსებობა, მაღალი საცხოვრებელი ხარჯები და დასაქმებულთათვის დისკომფორტული მგზავრობის ხანგრძლივობა, რაც საცობებითა და სატრანსპორტო პრობლემებითაა განპირობებული.
„ჩვენი ახალი საწარმო, დაახლოებით 5 წუთის სავალზეა ოსტინის აეროპორტიდან, ხოლო 15 წუთის სავალზე ქალაქის ცენტრიდან. ჩვენ ვგეგმავთ ეკოლოგიური სამოთხის შექმნას მდინარე კოლორადოს ნაპირებთან, რაც შესანიშნავი იქნება", - ამბობს მასკი.
ამასთან აღსანიშნავია, რომ 7 ოქტომბერს, Tesla-ს აქციები Nasdaq-ის პლატფორმაზე 1,4%-ით გაიზარდა და 793,61 დოლარის ღირებულებას მიაღწია.
