საქართველოს ხელოვნური ინტელექტის ასოციაციის პრეზენტაცია და AI Meetup
You're reading Entrepreneur Georgia, an international franchise of Entrepreneur Media.
საქართველოს ბანკის მხარდაჭერით და D ბლოკთან პარტნიორობით, საქართველოს ხელოვნური ინტელექტის ასოციაციის (GAIA) პრეზენტაცია და AI Meetup გაიმართა.
ღონისძიების მიზანს ასოციაციის შექმნის იდეის, მიზნების და გეგმების პრეზენტაცია წარმოადგენდა. ასოციაციის დამფუძნებლებმა და სხვა სპიკერებმა მიმოიხილეს საქართველოში, სხვადასხვა სფეროში, AI-ის განვითარების მიმართულებით არსებული მდგომარეობა, პერსპექტივები და გამოწვევები.
"საქართველოში ხელოვნური ინტელექტის ასოციაციის დაფუძნების მიზანი, ქვეყნის AI და მონაცემთა მეცნიერების მიმართულებით არსებული ძალიან დიდი პოტენციალის რეალიზების ხელშეწყობა და ამით ქვეყნის ეკონომიკური განვითარების მხარდაჭერაა. ეს მისია კი სამ მიზნად იშლება: AI წიგნიერების გაზრდა, ბიზნესების და სტარტაპების მხარდაჭერა და AI პროფესიონალების გაძლიერება ქართული AI-ის განვითარებისთვის. ამ საქმეში კი გაერთიანება და თანამშრომლობა ყველაზე მნიშვნელოვანია. ამის კარგი მაგალითი ასოციაციის პრეზენტაციაზე უკვე შედგა, რისთვისაც განსაკუთრებული მადლობა მთავარ მხარდამჭერ საქართველოს ბანკს და პარტნიორ D Block-ს ეკუთვნით." - გიგი გიორგაძე, ასოციაციის თავმჯდომარე
ღონისძიების ფარგლებში პანელური დისკუსიები გაიმართა, რომელშიც მონაწილეობა ხელოვნური ინტელექტის და მონაცემთა მეცნიერების, ბიზნესისა და სამართლის პროფესიონალებმა მიიღეს. პანელური დისკუსიების მონაწილეებმა AI-ის მდგომარეობა და განვითარების გზები განიხილეს ბიზნესის, სახელმწიფოს, მედიისა და საზოგადოების და პროფესიული პერსპექტივებიდან.
პრეზენტაციას ესწრებოდნენ ხელოვნური ინტელექტისა და მონაცემთა მეცნიერების პროფესიონალები, ენთუზიასტები, ანტრეპრენერები, კერძო და საჯარო სექტორის, არასამთავრობო სექტორის და მედიის წარმომადგენლები.
საქართველოს ხელოვნური ინტელექტის ასოციაცია (GAIA) არაკომერციული ორგანიზაციაა, რომლის მიზანია, საქართველოში AI წიგნიერების ამაღლება, ბიზნესების დახმარება AI ტექნოლოგიების დანერგვაში და სფეროს პროფესიონალების მხარდაჭერა ქართული AI-ის განვითარებაში.
