You can be on Entrepreneur’s cover!

4 გაკვეთილი ჯეფ ბეზოსისგან რისკი, როცა არასდროს ჩერდები და არასდროს ხარ პროგნოზირებადი

Opinions expressed by Entrepreneur contributors are their own.

You're reading Entrepreneur Georgia, an international franchise of Entrepreneur Media.

entrepreneur

ჯეფ ბეზოსმა Amazon-ი 23 წლის წინ წამოიწყო, როგორც წიგნების ონლაინმაღაზია. დღეს იგი მსოფლიოს უმსხვილესი საცალო მოვაჭრეა. გარდა ონლაინმაღაზიისა, Amazon-ი ფლობს ფილმების გადამღებ სტუდიას, რომელსაც "ოსკარისა" და "ემის" კონკურსების გამარჯვებული ფილმები აქვს შექმნილი. Amazon-ის ხელმომწერთა სერვისის – Amazon Prime-ის წევრთა რაოდენობამ 2017 წელს 80 მილიონ ადამიანს მიაღწია (2016 წელს ეს რიცხვი 58 მილიონი იყო). ყოველივე ამან, ბეზოსი მსოფლიოში ერთ-ერთი უმდიდრეს ადამიანად აქცია. მისი ნიჭი, დაინახოს შესაძლებლობები იქ, სადაც სხვები ვერ ხედავენ და ამ შესაძლებლობების სარეალიზაციოდ სხვებზე სწრაფად იმოქმედოს, საკმარისი იქნებოდა იმის სათქმელად, რომ იგი გაბედული მეწარმეა. თუმცა, ამასთან ერთად, ბეზოსმა თავი სრულიად მოულოდნელ გამოწვევებთან გამკლავების ექსპერტადაც გამოავლინა.

2017 წლის ივნისში ბეზოსმა ორგანული სურსათით მოვაჭრე ქსელი Whole Foods 13.4 მილიარდ აშშ დოლარად შეიძინა და უმალ შეამცირა პროდუქციაზე გასაყიდი ფასები (თუმცა მისი გეგმების სრული მასშტაბი ჯერაც არაა ბოლომდე ცნობილი). მის მიერ 2013 წელს შეძენილმა Washington Post-ის ჭკვიანურმა მართვამ მედიაბიზნესის მოწონება და შური დაიმსახურა. Washington Post-ის რეკლამიდან მიღებული შემოსავალი ყოველწლიურად ორნიშნა რიცხვებით იზრდება. ასევე გაიზარდა გაზეთის ონლაინმკითხველთა რაოდენობა და 2017 წელს თვეში 90 მილიონს გადააჭარბა. ამჟამად Washington Post-ი ქმნის ტექნოლოგიას, რომლის გამოყენებისთვისაც სხვა მედიაკომპანიები მას ფულს გადაუხდიან (ასეთი ტექნოლოგიის მაგალითებია Zeus, რომელიც ახდენს რეკლამის მომხმარებლამდე უსწრაფესად მიწოდებას; Heliograf, რომელიც გახლავთ Post-ის ავტომატური თხრობის სისტემა; და Clavis, რომელიც შინაარსის სარეკომენდაციო მექანიზმია. ერთი სიტყვით, ბეზოსი უბრალოდ კი არ ყიდულობს კომპანიას, არამედ იყენებს მას, რათა შეცვალოს ინდუსტრია.

იმისათვის, რომ გავიგოთ, თუ როგორ ვრცელდება ბეზოსის ზემოქმედება Amazon-ის კედლებს მიღმა, Amazon-ის ოთხ ყოფილ თანამშრომელს, რომლებიც ამჟამად თავიანთ დამოუკიდებელ კომპანიებს ხელმძღვანელობენ, ვთხოვეთ გაეხსენებინათ ის ძვირფასი გაკვეთილები, რომლებიც ყველაზე გაბედული ადამიანისგან მიიღეს.

ის რაც ოთხმა ანტრეპრენერმა ისწავლა ჯეფ ბეზოსთან მუშაობის დროს:

გაკვეთილი #1 - არ იდარდოთ ფულზე

Amazon-ში ჩემი მუშაობის პირველ წელს, პასუხისმგებელი ვიყავი "სივრცის მართვაზე", რაც ჩვენს საწყობებში ფართის გამოყენების ზედამხედველობას ნიშნავდა. შეცდომა დავუშვი და ზედმეტი პროდუქცია ზედა თაროებზე განვათავსე. როცა შეკვეთები მოვიდა, საწყობის თანამშრომლებს უჭირდათ ნივთების სიმაღლიდან დროულად ჩამოტანა შეკვეთების დასაკმაყოფილებლად. ეს უზარმაზარი შეცდომა იყო და ჯეფს ფულის დაზოგვის გეგმა შევთავაზე (შეკვეთების მინიმალური რაოდენობის გაუქმების გზით). ჩემი თავით ამაყი ვიყავი – ვფიქრობდი, რომ სიტუაციიდან გამოსავალი ვიპოვე. მან შემომხედა და მითხრა: "შეჩერდი. არ იდარდო ფულზე. გადატვირთე ყველაფერი რაც შეიძლება სწრაფად. არცერთი შეკვეთა არ გამოგრჩეს. დაითვალე, ეს რა დაგვიჯდება და ყველაფერი იღონე, რომ მსგავსი სიტუაცია აღარ განმეორდეს". ფულზე არ ვიდარდო? კომპანიების უმეტესობა ამბობს, რომ მომხმარებელი ყველაზე მთავარია მათთვის, მაგრამ ისინი იქცევიან ისე, როგორც მხოლოდ კომპანიის ინტერესებს ჭირდება. ჯეფისთვის მომხმარებელი მართლაც ყველაზე მნიშვნელოვანია". – ნადია შურაბურა, დამფუძნებელი და აღმასრულებელი დირექტორი, Hointer.

გაკვეთილი #2 - დაივიწყეთ შედეგი და აქცენტი თქვენ მიერ გაწეულ შრომაზე გაამახვილეთ

"საინტერესოა, როგორ ურთიერთქმედებს ჯეფ ბეზოსი უოლ სტრიტთან. იგი ამბობს: "მე არ მაინტერესებს შემოსავალი და მოგება. თუ თქვენ გინდათ, პასუხი მომთხოვოთ შემოსავალსა და მოგებაზე, მაშინ ნუ შეიძენთ Amazon-ის აქციებს". ამის ნაცვლად, იგი აქცენტს შრომაზე ამახვილებს – იმაზე, თუ როგორ ინტეგრირდება ახალი ინიციატივები Amazon Prime-თან; ასევე ამერიკელ ოჯახთა რაოდენობაზე, რომლებსაც იგი ემსახურება; საწყობებზე, რომელიც მან ააშენა. თვალი გადაავლეთ რელიგიურ ტექსტებსა და მითებს – მრავალ მათგანში მოთხრობილია მებრძოლებზე, რომლებიც მოვალეობას ასრულებდნენ და შედეგზე არ ნაღვლობდნენ. ძალზე ძლიერი კონცეფციაა, იყო შენი თამაშის ბატონ-პატრონი, მართავდე მის მსვლელობას და არ იდარდო იმაზე, რისი შეცვლაც არ შეგიძლია. გასული წლის განმავლობაში, გაყიდვებთან დაკავშირებით დაახლოებით 50 აღმასრულებელ დირექტორს ვესაუბრე და ჩემთვის დასაფიქრებელია, თუ როგორი მონდომებით ზრუნავენ ისინი ზრდაზე, შემოსავალსა და მოგებაზე, და ნაკლებად ფიქრობენ იმ ინვესტიციაზე, რომელიც ჩამოთვლილი მიზნების მისაღწევადაა საჭირო". – გურუ ჰარიჰარანი, დამფუძნებელი და აღმასრულებელი დირექტორი, Boomerang Commerce.

გაკვეთილი #3 - იყავი ლიდერი და არ უბრალოდ გადაწყვეტილების მიმღები

"2003 წელს გახლდით ადამიანთა იმ მცირე ჯგუფის წევრი, რომელსაც Amazon-ის ვებსერვისების შექმნის შანსი მიეცა. მე დამევალა მომეფიქრებინა, თუ როგორ უნდა მომხდარიყო ვებსერვისებიდან შემოსავლის მიღება. მუშაობის დაწყებიდან დაახლოებით ერთი წლის თავზე, ჩემს გუნდს ჰქონდა მომხმარებელთა ლოიალურობის პროგრამის შექმნის იდეა. დაინიშნა შეხვედრა ჯეფთან, რომელმაც აღნიშნა, რომ ჩვენი იდეა არ იყო კარგი Amazon-ისთვის. ჩემი მოკრძალებული ხასიათის მიუხედავად, გავბედე და ვკითხე: "შეგიძლიათ გვითხრათ, რატომ?" მას სულ თავისუფლად შეეძლო ჩემთვის არ ეპასუხა, მაგრამ ბეზოსი ასე არ მოიქცა. მან დიდი მოთმინებით დეტალურად აგვიხსნა, თუ რატომ არ იყო ჩვენი იდეა კარგი Amazon-ისთვის, თუმცა კარგი იქნებოდა სხვა ბიზნესებისთვის, რომლებიც იმ დროს ნერგავდნენ ლოიალურობის პროგრამებს. მე ამ ეპიზოდიდან ორი დიდი გაკვეთილი ვისწავლე: ერთი გახლდათ ის ნათელი აზროვნება, რომელიც ჯეფმა გამოამჟღავნა. მისი ლოგიკა იმდენად მყარი და ნათელი იყო, რომ მაიძულა სხვანაირად მეფიქრა. მას შემდეგ, ყოველთვის ვცდილობ ასეთივე ნათელი აზროვნებით მივუდგე პრობლემებს. მეორე გახლდათ ის, რომ ამ ეპიზოდმა ჩემში გააძლიერა მისი, როგორც ლიდერის, აღქმა, ვინაიდან მან გამოიყენა მომენტი, ჩემთვის რაღაცის ასახსნელად და სასწავლებლად". – ვიკას გუფთა, თანადამფუძნებელი და აღმასრულებელი დირექტორი, Wonder Workshop.

გაკვეთილი #4 - ასაკის მატების მიუხედავად, ეცადე იპოვო ბავშვად დარჩენის გზა

"მოკლედ რომ დავახასიათო, თუ რას ნიშნავს, გყავდეს ჯეფ ბეზოსი კომპანიის ლიდერად, ამას ასე ჩამოვაყალიბებდი: "იფიქრე მასშტაბურად". Amazon-ის შიდა სლოგანი შემდეგი ფრაზა იყო: "იმუშავე ბევრი, მიიღე სიამოვნება, შექმენი ისტორია". წამოაყენე დიდი იდეები, მაგრამ დეტალურად გათვალე მათი მიღწევის გზები. მთავარია შეძლო ის, რომ ყველა მომხმარებლის საჭიროებებზე იყოს ორიენტირებული. ამის მიღწევა შესაძლებელია სამუშაო ძალის ისეთ პატარა ჯგუფებად დაყოფით, რომლებიც მომხმარებელთან ახლოს იქნებიან. Amazon-ის ვებსერვისების ადრეულ ეტაპზე, ჩვენი გუნდები სხვადასხვა მომხმარებლის საჭიროებებზე ზრუნავდნენ. ჩემი გუნდი მუშაობდა იმ კლიენტებზე, რომლებსაც სურდათ გადახდების მიღება, ხოლო სხვა გუნდები მუშაობდნენ იმ კლიენტებზე, რომლებსაც უნდოდათ სასაწყობე ფართი. აზრი, რომ პატარა გუნდებად მუშაობა ამყარებდა მჭიდრო კავშირს მომხმარებელთან, აქტუალური იყო უფრო მასშტაბური ისეთი გუნდის ფარგლებშიც კი, როგორიც Amazon-ის ქსელური მომსახურებაა. ღრუბლოვან საკომუნიკაციო პლატფორმა Twilio-ში ჩვენ ამ მიდგომას "მომხმარებლის ფეხსაცმელების მორგება" დავარქვით. ჩვენს ოფისებში, ყველგან, სადაც უნდა შეხვიდეთ, ჩვენსავე მომხმარებლების მიერ გამოგზავნილ ფეხსაცმელებს წააწყდებით, რომლებიც მუდმივად გვახსენებს წარმატების მიღწევის ფორმულას". – ჯეფ ლოუსონი, დამფუძნებელი და აღმასრულებელი დირექტორი, Twilio.