ალტე უნივერსიტეტი სკოლის მოსწავლეებისთვის მასშტაბურ სასკოლო Start-up მარათონს იწყებს
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
თანამედროვე სამყაროში სამეწარმეო განათლება არა მხოლოდ ბიზნესის სფეროსთვის, არამედ ნებისმიერი პროფესიის ადამიანისთვის სასიცოცხლოდ მნიშვნელოვანია. მეწარმეობა არ ნიშნავს მხოლოდ საკუთარი კომპანიის შექმნას – ეს არის უნარ-ჩვევების კომპლექსი, რომელიც ეხმარება ადამიანს, იყოს კრეატიული, გამბედავი, დაინახოს შესაძლებლობები იქ, სადაც სხვები დაბრკოლებებს ხედავენ. ამისათვის საჭიროა, ახალგაზრდებმა ადრეული ასაკიდანვე განივითარონ სტრატეგიული აზროვნება, გუნდური მუშაობის უნარი და ინოვაციური მიდგომები. ამიტომაც, სასკოლო სივრცეში ისეთი აქტივობების დანერგვა, რომლებიც მოსწავლეებს სამეწარმეო აზროვნების ჩამოყალიბებაში დაეხმარება, ერთ-ერთი მთავარი პრიორიტეტია.
სკოლის მოსწავლეებისთვის ახალი შესაძლებლობების გაჩენის მიზნით, "ალტე უნივერსიტეტი", TBC for Youth - "თიბისი ახალი თაობისთვის", "თიბისი ბიზნესისთვის" - TBC For Business, Entrepreneur Georgia-სა და GITA • Tech Park-ის მხარდაჭერით ყოველწლიურ სასკოლო "Start-up მარათონს" იწყებს!
პროექტი წელს უკვე მესამედ ხორციელდება და მისი მიზანია სკოლის მოსწავლეებში ანტრეპრენერული აზროვნების განვითარება და მათი ინოვაციური იდეების მხარდაჭერა. "Start-up მარათონი" მოსწავლეებს აძლევს შესაძლებლობას, გაიგონ, რა არის მეწარმეობა და რა ეტაპებს გადის იდეა, სანამ რეალობად იქცევა. პროექტში ჩართვა შეუძლიათ X, XI ან XII კლასის მოსწავლეებს საქართველოს ნებისმიერი კუთხიდან, თუ აქვთ ინოვაციური იდეა და სურთ მისი განვითარება.
მონაწილეობის მსურველებმა უნდა გაიარონ რეგისტრაცია პროექტის ოფიციალურ გვერდზე. რეგისტრაცია იწყება 4 თებერვალს და გაგრძელდება 4 მარტის ჩათვლით. რეგისტრაციისთვის ეწვიეთ ბმულს.
რას მოიცავს "Start-up მარათონი"?
"Start-up მარათონი" არა მხოლოდ იდეების შეჯიბრია, არამედ სწავლებისა და განვითარების ერთიანი პროცესი, რომელიც მონაწილეებს სხვადასხვა მნიშვნელოვან გამოცდილებას სთავაზობს. პროექტი რამდენიმე ეტაპს მოიცავს, რომელიც მოსწავლეებს ეტაპობრივად შესაძლებლობას აძლევს, შეიმუშაონ თავიანთი იდეები, გაიღრმავონ ცოდნა და მიიღონ პრაქტიკული უნარები.
პირველი და უმნიშვნელოვანესი ეტაპი არის იდეების რეგისტრაცია. მოსწავლეები ავსებენ სპეციალურ სააპლიკაციო ფორმას, სადაც აღწერენ საკუთარ ბიზნესიდეას, მიზანს, სამიზნე აუდიტორიას და გუნდის წევრებს. ეს ეტაპი კრიტიკულად მნიშვნელოვანია, რადგან აქ მონაწილეები იწყებენ საკუთარი იდეების ფორმირებას და სწავლობენ, როგორ უნდა წარმოაჩინონ ისინი ეფექტურად.
მეორე ეტაპზე მიმდინარეობს იდეების გადარჩევა, რომლის ფარგლებშიც ჟიური აფასებს მიღებულ განაცხადებს და ირჩევს იმ იდეებს, რომლებიც ყველაზე ინოვაციური, პრაქტიკულად განხორციელებადი და პოტენციალით სავსეა. ეს პროცესი მნიშვნელოვანია იმისთვის, რომ პროექტში ჩაერთონ ის მოსწავლეები, რომელთა იდეებს რეალური განვითარების პერსპექტივა აქვთ.
შერჩეული მონაწილეები გადადიან მომზადების მესამე ეტაპზე, რომელიც მოიცავს ინტენსიურ ტრენინგებს. ამ ტრენინგებზე მოსწავლეები იღებენ ცოდნას ბიზნესის მართვის, ფინანსური დაგეგმვის, ინოვაციური პროექტების განვითარებისა და გუნდის მართვის მიმართულებით. ეს სესიები ეხმარება მონაწილეებს, უკეთ გააცნობიერონ, როგორ უნდა განავითარონ თავიანთი იდეები და როგორ უნდა მოარგონ ისინი ბაზრის მოთხოვნებს.
ტრენინგების დასრულების შემდეგ პროექტი გადადის მენტორინგის ეტაპზე. ამ პერიოდში მონაწილეებს ეძლევათ უნიკალური შესაძლებლობა, იმუშაონ გამოცდილ ბიზნესმენებთან, მეწარმეებსა და სფეროს ექსპერტებთან. მენტორები აქტიურად ეხმარებიან მოსწავლეებს თავიანთი იდეების დახვეწაში, ბიზნესმოდელის გაწერასა და სამოქმედო გეგმის ფორმირებაში. ეს ეტაპი კრიტიკულად მნიშვნელოვანია, რადგან ის მონაწილეებს პრაქტიკულ რჩევებსა და მიმართულებებს აძლევს, რაც იდეების რეალურ ბიზნესად ქცევაში დაეხმარება.
პროექტის დასკვნითი ეტაპია ფინალური ღონისძიება, სადაც მონაწილეები თავიანთ Start-up იდეებს ჟიურის წინაშე წარადგენენ. ჟიური აფასებს პროექტებს სხვადასხვა კრიტერიუმით, როგორიცაა ინოვაციურობა, ბაზრის პოტენციალი, შესრულების რეალისტურობა და იდეის გავლენა. საბოლოოდ გამოვლინდებიან გამარჯვებულები, რომლებსაც განსაკუთრებული მხარდაჭერა და პრიზები გადაეცემათ.
"Start-up მარათონის" გამარჯვებულებისთვის განსაკუთრებული პრიზებია გათვალისწინებული, რომლებიც მათ იდეების განვითარებასა და რეალობად ქცევაში დაეხმარება:
- "ალტე უნივერსიტეტი" გამარჯვებულ გუნდს შესაძლებლობას მისცემს, ისარგებლოს უნივერსიტეტში არსებული "ინოვაციებისა და მეწარმეობის ცენტრის" სერვისებით, რაც მოიცავს ბიზნესკონსულტაციას, ინვესტორებთან დაკავშირებასა და სტარტაპის განვითარების მხარდაჭერას;
- "თიბისი" თავის რჩეულ სტარტაპს გადასცემს ფულად პრიზს, რომელიც იდეის რეალიზაციის პროცესში მნიშვნელოვან ფინანსურ მხარდაჭერას უზრუნველყოფს;
- Entrepreneur Georgia ერთ-ერთ გამარჯვებულ პროექტს მედიასივრცეში გაშუქებით დაეხმარება, რაც მათ ცნობადობასა და პოტენციური პარტნიორების მოძიებაში დიდ როლს ითამაშებს;
- GITA • Tech Park კი ერთ-ერთ გუნდს პროტოტიპის შექმნაში დაეხმარება, რაც განსაკუთრებით მნიშვნელოვანია ტექნოლოგიური და ინოვაციური პროექტებისთვის.
"ალტე უნივერსიტეტი" ინარჩუნებს ლიდერი უნივერსიტეტის პოზიციას ინოვაციებისა და ტექნოლოგიების სფეროში - მჭიდრო თანამშრომლობით როგორც კერძო, ისე სახელმწიფო სექტორთან. უნივერსიტეტის მიზანია, ყოველწლიური "Start-up მარათონი" გახდეს საერთაშორისო მასშტაბის ღონისძიება, რომელიც ფართოდ მოიზიდავს დამწყებ ანტრეპრენერებს, ინვესტორებსა და გამოცდილ მეწარმეებს, რაც მას ინოვაციების განვითარების ერთ-ერთ მთავარ პლატფორმად აქცევს.
