როგორ გამოიყენებენ ქართველი მომხმარებლები Starlink-ის მაღალსიჩქარიან ინტერნეტს?
By ელენე ლომსაძე •
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
რეგიონში პირველად, Starlink-ის მაღალსიჩქარიანი ინტერნეტი საქართველოში უკვე ხელმისაწვდომია. ამის შესახებ ინფორმაციას ილონ მასკი, სოციალური ქსელ X-ის (ყოფილი Twitter) მეშვეობით ავრცელებს.
ილონ მასკის მიერ დაარსებული კომპანია SpaceX-ის Starlink-ი მსოფლიოში ერთ-ერთი მოწინავე სატელიტური ფართოზოლოვანი ინტერნეტსისტემაა, რომელიც უზრუნველყოფს მაღალსიჩქარიან ინტერნეტს მთელი მსოფლიოს მასშტაბით, მათ შორის ისეთ ადგილებშიც კი, სადაც ინტერნეტმიწოდება არ ხორციელდება ან დაბალი საიმედოობის, უხარისხო ინტერნეტკავშირია. Starlink-მა კომუნიკაციების კომისიაში სატელიტური ინტერნეტ სერვისების მიწოდების მიზნით ავტორიზაცია 2022 წელს გაიარა. კომპანიის ვებსაიტზე გამოქვეყნებული ინფორმაციის მიხედვით, ინტერნეტ სერვისით ვერ ისარგებლებენ საქართველოს ოკუპირებულ რეგიონებში.
რა ღირს სტარლინკის სერვისები ქართველი მომხმარებლებისთვის?
Starlink-ის მოწყობილობა, რომელიც მომხმარებელმა ერთჯერადად უნდა შეიძინოს, საქართველოსთვის 1,780₾ ღირს. ყოველთვიური სააბონენტო კი - 160₾-ს შეადგენს. აღჭურვილობა მოიცავს თანამგზავრული თეფშის სამაგრს, თეფშს, ინტეგრირებულ Wi-Fi როუტერსა და სხვა ყველა საჭირო მოწყობილობას, რომელიც საჭიროა ინტერნეტთან დასაკავშირებლად.
რამდენად სწრაფია სტარლინკის ინტერნეტი?
Starlink-ის ვებგვერდის თანახმად, ჩამოტვირთვის სიჩქარე 25-220 Mbps-ს შორის მერყეობს, თუმცა მომხმარებელთა უმეტესობისთვის სიჩქარე 100Mbps-ს შეადგენს. რაც შეეხება ატვირთვის სიჩქარეს, მისი მაჩვენებელი 5-დან 20 Mbps-მდე იცვლება.
რა განასხვავებს სტარლინკის ინტერნეტს?
განსხვავებით სხვა უკაბელო ინტერნეტის მომწოდებლებისგან, სტარლინკი ინტერნეტს სატელიტებით გვაწვდის. რაც ნიშნავს იმას, რომ მსოფლიოს ნებისმიერ წერტილში (სადაც Starlink-ი ავტორიზებულია), შესაძლებელია, დაბალი შეყოვნების ინტერნეტის მიწოდება.
Starlink-ის ოფიციალური გვერდის მიხედვით, ინტერნეტინფრასტრუქტურა უძლებს როგორც ბუნებრივ კატასტროფებს, ასევე - საკაბელო გათიშვასა და სხვა ინფრასტრუქტურულ დაზიანებებს. გარდა ამისა, სტარლინკის მოწყობილობები არის პორტატული და მისი სერვისებით სარგებლობა შესაძლებელია მათ შორის: გემზე, მაღალმთიან რეგიონებში, თვითმფრინავსა და სხვა ლოკაციებზე.
როგორ გამოიყენებენ ქართველი მომხმარებლები Starlink-ის მაღალსიჩქარიან ინტერნეტს?
სტარლინკის მომხმარებლები თანამგზავრებს სახლში დამონტაჟებული პატარა მიმღებით დაუკავშირდებიან. თანამგზავრული ტერმინალების დამონტაჟება შესაძლებელია ყველგან, სადაც ცისკენ ხედი ჩანს. უკეთესი ხარისხის ინტერნეტისთვის, სასურველია, მისი დაყენება სახურავზე ან ანტენაზე. Starlink-ის აპლიკაცია Android-სა და iOS-ზეა ხელმისაწვდომი და სწორედ ეს აპლიკაცია შემოგთავაზებთ, რომელია საუკეთესო ადგილი აღჭურვილობის დასამონტაჟებლად.
რა ღირს სტარლინკის სერვისები სხვა ქვეყნებში?
დღესდღეობით, Starlik-ის სერვისები 64 ქვეყანაში მუშაობს. გთავაზობთ ქვეყნების არასრულ ჩამონათვალსა და მათი შესაბამისი სერვისების ფასებს:
ქვეყანა | მოწყობილობის ფასი | თვიური სერვისის ღირებულება |
ჩრდ. ამერიკა | ||
აშშ | US$599 | US$120 |
კანადა | C$499 | CA$140 |
მექსიკა | MX$8 300 | MX$1 100 |
ევროპა | ||
გაერთიანებული სამეფო | £499 | £75 |
გერმანია | €299 | € 50 |
საფრანგეთი | €450 | € 40 |
იტალია | €450 | € 50 |
პორტუგალია | €450 | € 65 |
ესპანეთი | €450 | € 65 |
აზია | ||
იაპონია | ¥55 000 | JP¥6 600 |
ფილიპინები | PHP28 000 | PHP2700 |
მალაიზია | MYR2 300 | MYR220 |
სამხ. ამერიკა | ||
ბრაზილია | R$2 000 | R$184 |
პერუ | PEN875 | PEN 193 |
კოლუმბია | COP1 320 000 | COP210 000 |
ავსტრალია | ||
ავსტრალია | A$599 | A$ 139 |
აფრიკა | ||
ნიგერია | N299 500 | ₦38 000 |
კენია | KSh89 000 | KSh6 500 |
ზამბია | ZW10 744 | ZW 771 |
მოზამბიკი | MT40 492 | MT3 000 |
