როგორ შეიცვალა ინფლუენსერების შემოსავლის წყაროები ბოლო ათწლეულში
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
ინფლუენსერების ბიზნესი ბოლო ათწლეულის განმავლობაში განსაკუთრებით აქტუალური გახდა და ახლა ამ ინდუსტრიის ღირებულება, Forbes-ის მიხედვით, 250 მილიარდ დოლარს შეადგენს.
ჯერ კიდევ ათი წლის წინ, სააგენტო Billion Dollar Boy-ის შეფასებით, ინდუსტრიის ღირებულება სულ რაღაც 200 მილიონ დოლარს შეადგენდა. ამ პერიოდის განმავლობაში ინფლუენსერებისთვის ფულის გამომუშავება შემოსავლის ოდენობისა და მეთოდების თვალსაზრისით მნიშვნელოვნად შეიცვალა. ინფლუენსერების მარკეტინგი მრავალარხიან ინდუსტრიად იქცა, საიდანაც კრეატორები ბრენდებთან თანამშრომლობით შემოსავალს იღებენ.
Izea-ს ანგარიშის მიხედვით, Instagram-ზე დასპონსორებული პოსტის საშუალო ღირებულება 2014-დან 2019 წლამდე მნიშვნელოვნად შეიცვალა და 134,04 დოლარიდან 1 642,77 დოლარამდე გაიზარდა. ამავე პერიოდში, YouTube-ზე დასპონსორებული ვიდეოს საშუალო ღირებულება 420-დან 6 700 დოლარამდე გაიზარდა. დღეს Instagram-ზე შემქმნელები კოლაბორაციული პოსტებიდან წლის განმავლობაში ასობით ათასს, ან ზოგ შემთხვევაში მილიონებს გამოიმუშავებენ. YouTube-ზე შემოსავალი 1 000 ნახვაზე 1,61-დან 29,30 დოლარამდე მერყეობს, გამოცემა Business Insider-ის ინფორმაციით, ეს მონაცემები YouTube-ის პლატფორმას მოგებიან ბიზნესად აქცევს.
ისეთ კრეატორებს, ვისაც მილიონზე მეტი გამომწერი ჰყავთ, ექვსნიშნა თანხების გამომუშავება უკვე მარტივად შეუძლიათ, ხოლო უფრო დიდი აუდიტორიის ინფლუენსერებისთვის შემოსავალი ზოგჯერ მილიონებსაც აღწევს.
შემოსავლის მრავალფეროვანი წყაროები
ბოლო ათწლეულის განმავლობაში ინფლუენსერების ინდუსტრიაში მთავარი ცვლილება ისაა, რომ კრეატორებმა საკუთარი შემოსავლის მაქსიმალურ ნიშნულზე აწევა სოციალური ქსელების ფარგლებს გარეთ აქტივობებითაც დაიწყეს. კრეატირების ფინანსურ მენეჯმენტზე ფოკუსირებული კომპანიის, Inflverse-ის თანადამფუძნებელი, ლიამ პარკინსონი, თავადაც YouTube-ის კონტენტით გახდა ცნობილი. 2013 წელს 750 000 გამომწერი დააგროვა. ლიამი საკუთარი გამოცდილებით აფასებს, როგორ გადავიდა ინდუსტრია პლატფორმაზე მონეტიზაციით გამომუშავებული თანხის მოდელიდან ბრენდებთან თანამშრომლობაზე და შემოსავლის სხვა წყაროებზე. პარკინსონის თქმით, "ყველაზე გამოცდილი კრეატორები" ახლა სხვადასხვა გზით იღებენ შემოსავალს: ბრენდებთან თანამშრომლობით, საკუთარი პროდუქციის შექმნით, მერჩენდაიზით, სხვადასხვა კომერციული შეთანხმებებით.
ინფლუენსერი და Viral Marketing Stars-ის აღმასრულებელი დირექტორი, კატია ვარბანოვა ამბობს, რომ 2015 წელს კონტენტის შექმნა Periscope-სა და Busker-ზე დაიწყო. 2016 წელს Busker-მა მას 1 000 დოლარი გადაუხადა, რათა Snapchat-ის კონფერენციას დასწრებოდა. მისივე თქმით, ადრე კონტენტშემქმნელებს თანხის სანაცვლოდ პროდუქტის მიღება, ე.წ. ბარტერი აკმაყოფილებდათ, მაგრამ ახლა ისინი თავიანთ შრომას ფასს ადებენ. მაგალითად, თავად ვარბანოვას ერთმა ბრენდმა TikTok-ზე 30-წამიანი ვიდეოს სანაცვლოდ 5 000 დოლარი შესთავაზა. "ბრენდები მეტად არიან მზად, ინფლუენსერებში ფული ჩადონ", — ამბობს ვარბანოვა.
TikTok-ისა და Instagram-ის კონტენტშემქმნელი, ჯეიკობ ლუკასი, რომელიც ურთიერთობებზე რჩევებს აზიარებს, ამბობს, რომ მისი შემოსავალი ვიდეოს ნახვების რაოდენობაზე არასოდეს ყოფილა დამოკიდებული. ის ბრენდებთან თანამშრომლობით გამოიმუშავებს ფულს. ჯეიკობი ერთი ვიდეოსთვის საშუალოდ 8 000 ფუნტს (10 379 დოლარი) იღებს, თუმცა ფასი შეიძლება შემცირდეს, თუ კომპანია და პროდუქტი მოსწონს.
აუდიტორიის ჩართულობა და ავთენტურობა უფრო მნიშვნელოვანია, ვიდრე გამომწერების რაოდენობა
სავანა ბრიტი, PR სპეციალისტი და The Brittprint Agency-ის აღმასრულებელი დირექტორი, აღნიშნავს, რომ ადრე ბრენდები ყურადღებას ინფლუენსერების გამომწერების რაოდენობაზე ამახვილებდნენ. თუმცა ახლა მისი ზოგიერთი კლიენტი, მათ შორის ის, ვისაც 10 მილიონზე მეტი გამომწერი ჰყავს, ბრენდებთან თანამშრომლობის სიმცირეს განიცდიან. მიზეზი კი ის არის, რომ მეტად პრიორიტეტული აუდიტორიის ჩართულობა ხდება. "ახლა ბრენდებს სჭირდებათ კრეატორები, რომლებიც ამ მომენტში ტრენდულები არიან, - ამბობს ბრიტი, - შენი შემოსავალი და შესაძლებლობები განისაზღვრება იმით, თუ რამდენად აქტუალური ხარ მოცემულ მომენტში". სავანა ბრიტის თქმით, ამის კარგი მაგალითი ინფლუენსერი Reesa Teesa არის. TikTok-ზე 50 ვიდეოსგან შემდგარი სერიით, რომელიც ტოქსიკურ ყოფილ ქმარს ეხებოდა, Reesa Teesa პოპულარული გახდა და ერთ ღამეში თავისი შემოსავალი გააორმაგა.
გამოწვევები და მათი გადაწყვეტა
მიუხედავად იმისა, რომ ინფლუენსერობა კვლავ მოგებიანი სფეროა, კრეატორები ხშირად კორპორაციული ეკონომიკის ნადავლი ხდებიან და ზედმეტი მოთხოვნის გამო გადაწვის საფრთხის წინაშე დგებიან. პრობლემაა ისიც, რომ ბრენდები ზოგჯერ სამი თვის განმავლობაში არ ურიცხავენ თანხას ინფლუენსერებს, ზოგჯერ კი საერთოდ არ უხდიან. Inflverse-ის თანადამფუძნებლის აზრით, სააგენტო ინფლუენსერებისა და მათი ჰონორარის დროულად გადახდის საკითხს მოაგვარებს. "წარმოიდგინეთ, ჩვეულებრივ სამსახურში მუშაობთ და თქვენი ხელმძღვანელი გეუბნებათ, რომ 90 დღის განმავლობაში არ გადაგიხდით და ამ დროის გასვლის შემდეგაც კი არ ხართ გარანტირებული, რომ თანხას მიიღებთ", - ამბობს პარკინსონი.
ვარბანოვას აზრით, კრეატორებისთვის საუკეთესო გამოსავალი საკუთარი ბრენდებისა და კომპანიების შექმნაა, როგორც ეს ბევრმა ცნობილმა ინფლუენსერმა გააკეთა. ამგვარად ისინი საკუთარი გავლენის მონეტიზაციისას მხოლოდ ბრენდებთან კონტრაქტებზე დამოკიდებული არ იქნებიან. "მოიპოვე ერთგული აუდიტორია, შემდეგ კი წარადგინე მათთვის შექმნილი ბრენდები და პროდუქტები", - აღნიშნავს კატია ვარბანოვა.