როჯერ ფედერერი Uniqlo-სთვის კოლექციის შექმნაში მიიღებს მონაწილეობას
By თინათინ ლუხუტაშვილი •
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
როჯერ ფედერერი ტანსაცმლის ბრენდ Uniqlo-სთვის კოლექციას შექმნის. კოლაბორაციაში ბრიტანელი დიზაინერი, ჯონათან ანდერსონიც მიიღებს მონაწილეობას. კოლექციის შესახებ ცნობებს WWD ავრცელებს.
ჩოგბურთელისა და დიზაინერის ე.წ. კაფსულ-კოლექციის შესახებ მედიაში წერენ, რომ ის "ფედერერის სპორტული სტილისა და ანდერსონის ესთეტიკის ნაზავი იქნება".
მიუხედავად იმისა, რომ ფედერერისა და ანდერსონის გზები პირველად გადაიკვეთა, იაპონურ ბრენდთან თანამშრომლობის ისტორია ორივეს აქვს. ჩოგბურთელი 2018 წლის შემდეგ არის ბრენდის სახე, ხოლო დიზაინერი 2017 წლიდან ქმნის კოლექციებს Uniqlo-ს ქალისა და მამაკაცის ხაზებისთვის.
ფედერერი აცხადებს, რომ მას ყოველთვის სურდა კოლექციაზე მუშაობა, რომელიც ერთდროულად იქნებოდა "იდეალური ჩოგბურთის სათამაშოდ და ყოველდღიურ მრავალფეროვნებაში გამოსაყენებლად".
"ერთად ჩვენ შევძელით შეგვექმნა კოლექცია, რომელიც ელეგანტური და კომფორტულია ჩოგბურთის კლასიკურ სტილში. ჯონათანი ნიჭიერი, კრეატიული და წარმოუდგენლად უშუალო ადამიანია. მასთან მუშაობა სასიამოვნო იყო", − ამბობს როჯერ ფედერერი.
კოლექციაში გენდერულად ნეიტრალური ცხრა სამოსი შევა, მათ შორის, პოლოები, სვიტერები და სპორტული ჩანთები. ძირითადი ფერები შავი, თეთრი, ნაცრისფერი და ლურჯის გრადაციებია. ტანსაცმელი ბრენდის ე.წ. Dry Ex მასალითაა შექმნილი. როგორც კომპანიაში ამბობენ, მატერია უზრუნველყოფს, რომ მომხმარებელი "გრილად და მშრალად" დარჩეს.
