დიდება უკრაინას! დიდება გმირებს! თავდადება, შეუპოვრობა, სიმამაცე, გაბედულება, სიმტკიცე, რწმენა!

Opinions expressed by Entrepreneur contributors are their own.

You're reading Entrepreneur Georgia, an international franchise of Entrepreneur Media.

ფოტო: ალექსეი სეროვი

2022 წლის 25 თებერვალია. თებერვლის ნომერი უკვე სტამბაშია და, ტრადიციულად, ჩემს ახალ სარედაქტორო სტატიას ელოდება. პირველად ხდება, რომ ვერ ვახერხებ თემის შერჩევას, არადა რამდენიმე კარგი იდეა მაქვს... არჩევანი, როგორც იქნა, გავაკეთე. ვფიქრობ სტატიის შინაარსზე, გონებაში ვალაგებ სტრუქტურას, ვიცი, როგორ ვიწყებ და როგორ ვამთავრებ, მაგრამ პირველად ხდება, რომ წერას ვერ ვიწყებ.

მოუცლელობას ვაბრალებ. თუმცა თავადვე მიკვირს. საქმე ყოველთვის ბევრი მქონდა. გასაგებია, რომ დღეს კიდევ უფრო მეტი მაქვს, მაგრამ სარედაქტოროს დასაწერად დროს ხომ ყოველთვის ვნახულობდი?

რაღაც მომენტში ვხვდები ჩემი აფორიაქების ნამდვილ მიზეზს. დღეს, 2022 წლის 25 თებერვალს, პუტინის რუსული არმია კიევის მისადგომებთანაა... ამას ნამდვილად არავინ ელოდა. მთელი მსოფლიო შოკშია, მაგრამ უკვე ყველამ გააცნობიერა, რომ თანამედროვე სამყაროს მთავარ მტერთან გვაქვს საქმე, რომლისგანაც, სამწუხაროდ, ყველაფერი მოსალოდნელია.

პარალელურად ვეცნობი სიახლეებს უკრაინელი ხალხის იშვიათი გმირობისა და სამშობლოსადმი თავდადების შესახებ. ეს ყველაფერი ჩვენს თვალწინ, პირდაპირ ეთერში, ხდება.

უნდა ვაღიარო, თავად ისტორიკოსს (პირველი სპეციალობით), ისტორიაში შემონახული სხვადასხვა გმირული ამბები გაზვიადებულად მიმაჩნდა. ვუშვებდი, რომ ქაღალდზე გადატანილი „საქმენი საგმირონია" იმ დროის ისტორიკოსების ნაწილობრივ სიმართლისა და ნაწილობრივ ფანტაზიის ნაყოფი იყო.

მაგრამ, ჰოი საოცრებავ... ფრონტიდან მოსულ სიახლეებს რამდენიმე საინფორმაციო არხის საშუალებით ვეცნობი, თუმცა მათ, მიუხედავად თემატური და კონცეპტუალური სხვაობისა, ოპერატიულობით არც ჩვენი Entrepreneur.ge ჩამორჩება და სწორედ აქ ვკითხულობ ისტორიას, რომელმაც სულით ხორცამდე შემძრა.

ეს იყო იშვიათი ემოცია, რომელიც აქამდე განცდილ არცერთ ემოციას არ ჰგავდა – ერთდროულად, ჩვენი მამაცი უკრაინელი ძმებით სიამაყის, მათი გმირული თავდადებით აღტაცებისა და, ამავე დროს, უკრაინელი პატრიოტების ბრძოლის ველზე დაღუპვით გამოწვეული ძლიერი ემოცია.

და ამ მომენტში მივხვდი, რომ ვერაფერს უფრო ღირებულს, გარდა იმისა, რომ ქართული Entrepreneur-ის 2022 წლის თებერვლის ნომერში ამ გმირობის ისტორიის გადმოცემა და მომავალი თაობებისთვის დატოვებაა, ვერც დავწერდი და არც იყო საჭირო!

თან მივხვდი იმასაც, რომ ანტრეპრენერობის იდეა, რომლის საქართველოში დამკვიდრებისთვის უკვე ოთხი წელია ჩვენი შესაძლებლობების მაქსიმუმს ვაკეთებთ, სხვა არაფერია, თუ არა იმ თვისებების ერთობლიობა, რითაც ასე უხვად არიან დაჯილდოებული ჩვენი გმირი უკრაინელი ძმები – თავდადება, შეუპოვრობა, სიმამაცე, გაბედულება, სიმტკიცე, რწმენა!

აი მათი გმირობის ამბავიც: შავ ზღვაში, ოდესის სანაპიროს სიახლოვეს, კუნძულ „ზმეინზე" განთავსებული უკრაინული გარნიზონი რუსულმა ძალებმა ალყაში მოაქციეს და უკრაინელ სამხედროებს დანებება მოსთხოვეს, რაზეც უკრაინელმა ჯარისკაცებმა უარი განუცხადეს!

პირველი შეტევა უკრაინელებმა წარმატებით მოიგერიეს, რის შემდეგაც რუსებმა კვლავ ულტიმატუმი წაუყენეს და უკრაინელების მორიგი უარის შემდეგ შავ ზღვაში განთავსებული ხომალდებიდან, მათ შორის კრეისერ „მასკვადან" მიტანილი იერიშით უკრაინელი მებრძოლების სამხედრო ბაზა გაანადგურეს.

ცოტა ხანში, კუნძული რუსულმა საფრონტო ბომბდამშენმა Su-24-მა დაბომბა, თუმცა სამხედროებმა დანებებაზე კვლავ უარი განაცხადეს. ბოლოს კი მასირებული სარაკეტო, საჰაერო და სახმელეთო შეტევით თოთხმეტივე უკრაინელი სამხედრო, თავისი გარნიზონის მიუტოვებლად, ბრძოლის ველზე გმირულად დაეცა.

სარედაქტოროს დასასრული.

25 თებერვალი. 2022 წელი

დიდება უკრაინას! დიდება გმირებს!

Wavy Line
გიორგი შარაშიძე

მთავარი რედაქტორი

  • ანტრეპრენერი და ტოპმენეჯერი, რომლის განსაკუთრებული ინტერესის სფეროებს წარმოადგენს მეწარმეობა, ლიდერობა და პერსონალური განვითარება, სტრატეგიული მენეჯმენტი, საერთაშორისო ბიზნესის მართვა, მარკეტინგი და გაყიდვები.
  • გიორგი არის მანჩესტერის ბიზნესსკოლის (Manchester Business School) და საქართველოს საზოგადოებრივ საქმეთა ინსტიტუტის (GIPA) მაგისტრი. დამთავრებული აქვს თბილისის სახელმწიფო უნივერსიტეტის ისტორიის ფაკულტეტის ასპირანტურა.
  • მან 2000 წლის მარტში, 23 წლის ასაკში, დააფუძნა საქართველოს წამყვანი ინგლისურენოვანი გაზეთი Georgia Today, რომელსაც მოჰყვა მის მიერ ისეთი გავლენიანი მედიასაშუალებების დაარსება და განვითარება, როგორიცაა Where.ge, The Economist-ის წლიური გამოცემა The World In, ჟურნალი OK! რადიო NRJ. 2018 წლის აპრილიდან მისი რედაქტორობით გამოდის ჟურნალი Entrepreneur Georgia − ცნობილი ამერიკული ბრენდის ლიცენზირებული ქართულენოვანი გამოცემა ბეჭდვით და ონლაინპლატფორმებზე.
  • გიორგი არის საქართველოს საზოგადოებრივ საქმეთა ინსტიტუტის (GIPA) მოწვეული ლექტორი მედიამენეჯმენტსა და მედიამეწარმეობაში, საქართველოს საზოგადოებრივ საქმეთა ინსტიტუტისა და „დოიჩე ველე“ აკადემიის მიერ დაფუძნებული კავკასიის მედიასკოლის სტრატეგიული მენეჯმენტის მოდულის თანაავტორი და მენტორი. მეწარმეობის სამაგისტრო კურსს კითხულობდა ილიას უნივერსიტეტის ბიზნესსკოლაში.
  • გიორგი შარაშიძის საავტორო პოდკასტებს შეგიძლიათ მოუსმინოთ აქ: https://soundcloud.com/entrepreneur_ge

Related Topics

ლიდერობა

10 გზა თვითშეფასების ასამაღლებლად

"დაბალი თვითშეფასება ცხოვრებაში ამოწეული ხელის მუხრუჭით გადაადგილებას ჰგავს"

ინსპირაცია

25 ფრაზა, რომლებმაც შემცვალეს

ხშირად ერთ ფრაზას ადამიანის მთელი ცხოვრების შეცვლა შეუძლია