ემოციური კავშირი, როგორც მთავარი ღირებულება: "სტრადასა" და "ოროს" განვითარების ახალი ეტაპი
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
უკვე თვეზე მეტია, რაც ქეთევან მეფარიძე "სტრადასა" და "ოროს" მარკეტინგის მიმართულებას ხელმძღვანელობს. თუმცა, როგორც თავად აღნიშნავს, "სტრადა" მისთვის ბევრად უფრო ადრე გახდა ყოველდღიურობის ნაწილი, ვიდრე პროფესიულ როლში აღმოჩნდებოდა.
"უკვე წლებია, რაც "სტრადა" ჩემი ყოველდღიურობის ნაწილია. ჩემთვის ეს სივრცე ბევრ სასიამოვნო საღამოსთან ასოცირდება. როდესაც მეგობრები ვიკრიბებით, ვგეგმავ საქმიან შეხვედრას ან, უბრალოდ, საყვარელი კერძი მომენატრება, "სტრადა" ჩემი არჩევანია", – ქეთევან მეფარიძე, "სტრადასა" და "ოროს" მარკეტინგის მიმართულების ხელმძღვანელი.
დღეს მისი ურთიერთობა ბრენდთან ახალ ეტაპზეა. თუ ადრე სტუმრის როლში ხედავდა სივრცეს, ახლა უკვე შიდა პროცესების მონაწილეა და იმ გუნდთან მუშაობს, რომელმაც წლების წინ კვების ინდუსტრიაში მნიშვნელოვანი ცვლილებები განახორციელა.
ქეთევანის შეფასებით, განსაკუთრებით ამაღელვებელია ის ფაქტი, რომ ახლა უკვე არა მხოლოდ მუდმივი სტუმარი, არამედ ბრენდის ნაწილია და მუშაობს იმ ადამიანებთან ერთად, რომლებმაც თვისობრივად შეცვალეს კვების ინდუსტრია, ხარისხის სტანდარტები და მომსახურების კულტურა.
2026 წელი ორივე ბრენდისთვის, "სტრადასა" და "ოროსთვის", სიახლეებსა და სასარგებლო ინიციატივებთან იქნება დაკავშირებული. მარკეტინგული სტრატეგია ეფუძნება ღირებულებების მკაფიო გამოკვეთას და ბრენდების კიდევ უფრო გაძლიერებას. ამასთან, ერთ-ერთი მთავარი ამოცანაა სტუმრებისთვის ხუთივე ფილიალში კიდევ უფრო დასამახსოვრებელი გამოცდილების შექმნა.
როგორც ქეთევანი აღნიშნავს, 12 წლის წინ "სტრადამ" ბაზარზე თამაშის სრულიად ახალი წესები შემოიტანა და შედეგად მომხმარებლებში უფრო მაღალი ხარისხის მოთხოვნა გააჩინა. სწორედ ამ საჭიროების გათვალისწინებით დაიგეგმა ახალი მარკეტინგული სტრატეგიაც, რომელიც ხარისხის მოლოდინს კიდევ უფრო გააძლიერებს.
დამკვიდრებული და ფართოდ ცნობილი ბრენდის მარკეტინგში მუშაობა თავისთავად განსხვავებული გამოწვევაა. მისი თქმით, საინტერესოა იმ ბრენდის გაძლიერებაზე ზრუნვა, რომელსაც მომხმარებლის გონებაში უკვე მკაფიოდ ჩამოყალიბებული ხასიათი აქვს.
"სტრადა" მაღალი ცნობადობით გამოირჩევა და მნიშვნელოვანია, ჩვენს სტუმრებსა და გულშემატკივრებს მუდმივად შევთავაზოთ სიახლეები და ახალი ინიციატივები. ამასთანავე, გვსურს, ჩვენი საკომუნიკაციო არხების საშუალებით ახალ მომხმარებლებსაც გავაცნოთ ბრენდის ხასიათი და მოვუყვეთ იმ გარემოს შესახებ, რომელიც ადგილზე დახვდებათ".
რაც შეეხება "ოროს", "სტრადასთან" შედარებით ის ახალგაზრდა ბრენდია, თუმცა უკვე მყარად ასოცირდება გემრიელ ქართულ სამზარეულოსთან. საწყის ეტაპზე ბრენდი ბაზარზე მეგრული კერძებით პოზიციონირდებოდა, თუმცა მიმდინარე წლიდან ეს მიდგომა იცვლება.
მისი თქმით, მენიუ უკვე მოიცავს არა მხოლოდ მეგრულ, არამედ საქართველოს სხვადასხვა კუთხის კერძებს, რომლებიც განსაკუთრებული გემოებითა და მრავალფეროვნებით გამოირჩევა. ამ ცვლილებით "ორო" საკუთარ იდენტობას აფართოებს და აუდიტორიას უფრო მრავალფეროვან კულინარიულ გამოცდილებას სთავაზობს.
ორივე ბრენდის აუდიტორიას საერთო მოლოდინი აქვს, კომფორტული და სასიამოვნო გარემო, კეთილგანწყობილი გუნდი, მრავალფეროვანი მენიუ და გემრიელი კერძები. თუმცა კომუნიკაციის ტონი და აქცენტები განსხვავდება.
"ოროს" შემთხვევაში გვინდა მომხმარებლებს გაუჩნდეთ განცდა, რომ რესტორანში სტუმრობისთვის განსაკუთრებული დღის დაგეგმვა აუცილებელი არ არის. კვირის ნებისმიერ დღეს შესაძლებელია "ოროში" მეგობრებთან შეხვედრა ან კოლეგებთან ერთად ლანჩზე ქართული კერძების შეკვეთა".
2026 წლის პრიორიტეტებს შორის ორივე ბრენდისთვის ცენტრალური ადგილი უჭირავს მომხმარებელზე ორიენტირებულ კომუნიკაციასა და უნიკალური გამოცდილების შექმნის ხაზგასმას. ასევე, იგეგმება იმ ადამიანების უფრო ახლოს გაცნობა საზოგადოებისთვის, რომლებიც ყოველდღიურად ხვდებიან სტუმრებს და რეალურად ქმნიან ბრენდის სახეს.
ჰორეკა სექტორში, ქეთევანის შეფასებით, მხოლოდ პროდუქტი აღარ არის საკმარისი. მაღალი ხარისხის მომსახურება და გემრიელი კერძები უკვე საბაზისო სტანდარტად იქცა.
"ადამიანებისთვის განსაკუთრებით ღირებულია ბრენდთან ემოციური კავშირი და დასამახსოვრებელი გამოცდილების მიღება".
ციფრული მარკეტინგი სტრატეგიის განუყოფელი ნაწილია. სოციალური მედია, ინფლუენსერები და კოლაბორაციები მნიშვნელოვან როლს ასრულებს, თუმცა მთავარი აქცენტი მხოლოდ არხებზე არ კეთდება.
მისი თქმით, თანამედროვე ბრენდებისთვის უმთავრესია მომხმარებელთან გადაკვეთის ყველა წერტილში ერთიანი გამოცდილების შექმნა და ბრენდის ღირებულებებთან თანხვედრაში მყოფი სარეკლამო განთავსებებისა თუ კოლაბორაციების დაგეგმვა.
თუ 2026 წლის ბოლოს შევხედავთ, წარმატების საზომად ის სტუმრებისთვის გამორჩეული გამოცდილების კიდევ უფრო განვითარებას და ახალი, საინტერესო სიახლეების მუდმივ დანერგვას მიიჩნევს.
"ჩვენი მთავარი მიზანია გავაგრძელოთ და კიდევ უფრო განვავითაროთ სტუმრებისთვის გამორჩეული გამოცდილების შეთავაზება და მუდმივად შევთავაზოთ მათ სიახლეები".
