გახდი მენტორი და დაეხმარე დამწყებ ბიზნესს საქართველოს რეგიონებში! Entrepreneur რეგიონებში ცოდნისა და გამოცდილების გაზიარების აქტიურ კამპანიას იწყებს!
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
როგორც უკვე ბევრმა თქვენგანმა იცის, ჟურნალი Entrepreneur საქართველოს რეგიონებში ცოდნისა და გამოცდილების გაზიარების აქტიურ კამპანიას იწყებს!
შექმნილი ვითარებიდან გამომდინარე, კამპანია, უპირველესად, ტურიზმისა და სტუმარმასპინძლობის სექტორის მცირე და საშუალო მეწარმეების დახმარებას ისახავს მიზნად.
Entrepreneur-ის გუნდის სახელით, მოგიწოდებთ ჩაერთოთ შიდა ტურიზმის ხელშეწყობის სოციალურ კამპანიაში და თქვენი ცოდნისა და გამოცდილების გაზიარებით, დამწყებ მეწარმეებს ბიზნესის განვითარებაში დაეხმაროთ.
თუ მიგაჩნიათ, რომ გაქვთ სათანადო ცოდნა და გამოცდილება უშუალოდ ტურიზმის ინდუსტრიაში, ან ხართ იმ სფეროს პროფესიონალი, რომლის სწორად გამოყენებაც აუცილებელია ახალბედა ბიზნესისთვის, ეს იქნება მენეჯმენტი, მარკეტინგი, გაყიდვები, სტრატეგია, სოციალური მედია, ადამიანური რესურსების მართვა თუ სხვა, შემოგვიერთდით!
თქვენივე სურვილით აარჩიეთ საქართველოს რეგიონში მდებარე რომელიღაც მცირე ტურისტული ობიექტი − იქნება ეს საოჯახო სასტუმრო, კვების ობიექტი, მარანი თუ ტურისტული მომსახურება ადგილობრივ დონეზე, და გახდით მისი მენტორი უახლოესი თვეების განმავლობაში.
დაეხმარეთ იმ ადამიანებს, ვისთვისაც ყველაზე ძვირფასი ამ ეტაპზე სწორედ რჩევა, კონსულტაცია და კომპეტენციით გამყარებული მორალური თანადგომაა, რომ მათ სწრაფად დაძლიონ არსებული გამოწვევები და დროულად ადაპტირდნენ ცვალებად გარემოსთან.
ეს იქნება უპრეცედენტო კამპანია, რომლის ფარგლებშიც პროფესიონალები მთელი საქართველოს მასშტაბით გაერთიანდებიან ერთი იდეის გარშემო – უსასყიდლოდ, მოხალისეობრივ საწყისებზე გვერდში დაუდგნენ დამწყებ მეწარმეებს საქართველოს რეგიონებში და საკუთარი ცოდნა და გამოცდილება გაუზიარონ!
დღეს საქართველო თავისი შესაძლებლობების მხოლოდ მცირე ნაწილს იყენებს. ამის მიზეზი კი სწორედ ცოდნისა და კომპეტენციის, ისევე როგორც მოტივაციის, ნაკლებობა და საკუთარი შესაძლებლობების დაუფასებლობაა.
სწორედ ამიტომ იწყებს ქართული ანტრეპრენერი მენტორობის საყოველთაო, მოხალისეობრივ კამპანიას!
შემოგვიერთდით!
შეავსე მარტივი ფორმა და დარეგისტრირდი! http://bit.ly/2YL3FF4
ერთად ვიმოგზაუროთ საქართველოში და გავუზიაროთ ერთმანეთს ყველაზე მთავარი – ცოდნა და გამოცდილება!
