ორი ქართველი ანტრეპრენერის NFT-სტარტაპმა - Rarify $100-მილიონიანი ვალუაციის ინვესტიცია მოიზიდა სტარტაპის ტექნოლოგიური გუნდის უმეტეს ნაწილს უკრაინელები შეადგენენ, რომლებიც ამ დრომდე, უკრაინის ტერიტორიაზე რჩებიან და განაგრძობენ მუშაობას
You're reading Entrepreneur Georgia, an international franchise of Entrepreneur Media.
სულ ახლახან ცნობილი გახდა, რომ ორი ქართველი ანტრეპრენერის NFT-სტარტაპმა Rarify, A საინვესტიციო რაუნდზე $12 მილიონის მოზიდვა მოახერხა, $100 მილიონიანი ვალუაციით, ვენჩურული კაპიტალის კომპანია Pantera Capital-ისგან, რომელიც ერთ-ერთი პირველი კრიპტომიმართულებაზე ორიენტირებული ფონდია. Pantera-ს ყურადღება განსაკუთრებით მიიქცია Rarify-ის პროგრამულმა უზრუნველყოფამ, რომელიც NFT-ების შექმნასა და გაყიდვას ამარტივებს.
"ჩვენი მიზანია გავამარტივოთ ეს პროცესი დაახლოებით ისე, როგორც Square-იმ გაამარტივა გადახდების მიღება", − აცხადებს კომპანიის თანადამფუძნებელი რევაზ წივწივაძე, − "დღეისათვის უმსხვილეს NFT-პლატფორმაზე OpenSea შეღწევა 14-ნაბიჯიანი პროცესია, რომლის ჩამოყვანა სულ რაღაც სამ ეტაპამდე გვსურს". Rarify-ში მიიჩნევენ, რომ სამომავლოდ ისინი შექმნიან პროგრამულ უზრუნველყოფას NFT-ის საინვესტიციო ღირებულების შესაფასებლად, რომელიც დღემდე ვოლატილური და დაურეგულირებელი აქტივის კლასად რჩება.
კომპანია Rarify-ის თანადამფუძნებელი, ქართველი რევაზ წივწივაძე გახლავთ, რომელიც ხუთი წელი კომპანია Shutterstock-ის პროდუქტის მენეჯერის პოზიციაზე მუშაობდა. აღსანიშნავია, რომ გასულ წელს, Shutterstock-მა ხელი მოაწერა Rarify-ის ტექნოლოგიის ტესტირების შესახებ ხელშეკრულებას. საწყისი რაუნდის ინვესტიციის მოცულობამ $3 მილიონი შეადგინა და მასში მონაწილეობა კომპანიებმა − Greycroft და Einac Ventures მიიღეს.
Rarify-ის 14 თანამშრომლიდან 4, მათ შორის ტექნიკური დირექტორი და მთავარი ინჟინერი, ამ დროისთვისაც უკრაინაში რჩებიან, სადაც საომარი ვითარების დაწყებამდეც ცხოვრობდნენ. კომპანიის მეორე ქართველი თანადამფუძნებელი − ლაშა ანთაძე აგრეთვე უკრაინაში ცხოვრობდა, თუმცა ქვეყანა რამდენიმე კვირის წინ დატოვა.
ანთაძის თქმით, უკრაინაში დარჩენილ თანამშრომლებთან კავშირის დამყარება ომის პირობებში საგრძნობლად გართულდა. "ისინი ამ დროისათვის უკრაინის ორ უმსხვილეს ქალაქში − კიევსა და ხარკოვში იმყოფებიან, რომლებიც ყველაზე ცხელ წერტილებს წარმოადგენენ", − განმარტავს ლაშა ანთაძე.
