საქართველოს ხელოვნური ინტელექტის ეროვნული ნაკრები ასტანაში, IOAI 2026-ზე იასპარეზებს
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
ხელოვნური ინტელექტის (AI) სფერო მსოფლიოში უპრეცედენტო სისწრაფით ვითარდება და საქართველო ამ პროცესის აქტიური მონაწილეა. უკვე ცნობილია საქართველოს ეროვნული ნაკრების სრული შემადგენლობა, რომელიც 2–8 აგვისტოს ყაზახეთის დედაქალაქ ასტანაში, ხელოვნური ინტელექტის საერთაშორისო ოლიმპიადაზე (IOAI 2026) იასპარეზებს.
საქართველოს ნაკრებს მსოფლიოს 103 ქვეყნის საუკეთესო ახალგაზრდა ტალანტებთან მოუწევს კონკურენცია.
2025 წელი საქართველოსთვის ისტორიული აღმოჩნდა – ქვეყანამ საერთაშორისო AI ოლიმპიადაზე პირველად მიიღო მონაწილეობა და პირველივე წელს სადებიუტო მედალი მოიპოვა. წელს კი ეროვნული ნაკრები კიდევ უფრო ძლიერი გამოცდილებითა და ამბიციური მიზნებით მიემგზავრება.
საქართველოს ეროვნული ნაკრები
- მათე რეხვიაშვილი – ვლადიმირ კომაროვის თბილისის ფიზიკა-მათემატიკის N199 საჯარო სკოლა
- ნიკოლოზ ყიფშიძე – ქალაქ თბილისის N136 საჯარო სკოლა
- ნიკოლოზ გეგენავა – ვლადიმირ კომაროვის თბილისის ფიზიკა-მათემატიკის N199 საჯარო სკოლა
- გიორგი მაისურაძე – ვლადიმირ კომაროვის თბილისის ფიზიკა-მათემატიკის N199 საჯარო სკოლა
- ლუკა ბერიკელაშვილი – ვლადიმირ კომაროვის თბილისის ფიზიკა-მათემატიკის N199 საჯარო სკოლა
- ანტონ ინგოროყვა – ვლადიმირ კომაროვის თბილისის ფიზიკა-მათემატიკის N199 საჯარო სკოლა
- ნიკოლოზ კილაძე – გივი ზალდასტანიშვილის სახელობის ამერიკული აკადემია თბილისში
- გიორგი ცქიტიშვილი – ვლადიმირ კომაროვის თბილისის ფიზიკა-მათემატიკის N199 საჯარო სკოლა
ნაკრების მომზადებას ხელმძღვანელობს შოთა ელკანიშვილი, ხოლო სასწავლო პროგრამის ლექტორები არიან ნიკოლოზ მიქაბერიძე და ლუკა დარსალია.
ნაკრების წევრებს მრავალფეროვანი საერთაშორისო გამოცდილება აქვთ. მათ შორის არიან მათემატიკის, რობოტიკისა და სხვა საერთაშორისო ოლიმპიადების მონაწილეები, ასევე IOAI-ის შარშანდელი კონკურსანტები. მიუხედავად განსხვავებული გამოცდილებისა, ყველას ერთი მიზანი აერთიანებს — საქართველოს ღირსეულად წარმოდგენა საერთაშორისო ასპარეზზე.
გიორგი მაისურაძე:
"წინა წლის საოლიმპიადო გამოცდილებამ პრობლემების ანალიზი, კრიტიკული აზროვნება და რთული ამოცანების ეფექტიანი გადაჭრა მასწავლა."
ნიკოლოზ ყიფშიძე:
"საქართველოს წარმომადგენლობა ჩემთვის დიდი პასუხისმგებლობაა. ვცდილობ, მაქსიმალურად სერიოზულად მოვეკიდო როგორც საკუთარ მომზადებას, ისე გუნდის საერთო მიზანს."
მათე რეხვიაშვილი:
"საერთაშორისო ოლიმპიადაზე წარმატებისთვის მხოლოდ ცოდნა არ არის საკმარისი — საჭიროა სწორი სტრატეგია და დროის ეფექტიანი მართვა."
ლუკა ბერიკელაშვილი:
"პასუხისმგებლობა დიდია, მაგრამ ჩემი მთავარი მიზანი ოქროს მედალია."
საქართველოს ეროვნული AI ნაკრების მომზადებას საფუძვლად უდევს საქართველოს ტექ ოლიმპიადების ჰაბი, რომელიც ბიზნესისა და ტექნოლოგიების უნივერსიტეტის (BTU) ინიციატივითა და TBC-ის მხარდაჭერით შეიქმნა.
ჰაბი უზრუნველყოფს ტექნოლოგიური მიმართულების ეროვნული ნაკრებების შერჩევას, სისტემურ მომზადებასა და საერთაშორისო ოლიმპიადებში მონაწილეობას.
IOAI-ისთვის მოსწავლეთა რვათვიან ინტენსიურ მომზადებას, სპეციალური სასწავლო პროგრამის შექმნასა და განხორციელებას საქართველოს ხელოვნური ინტელექტის ასოციაციამ (GAIA) უზრუნველყო. AI LIGA-ს ფარგლებში მონაწილეებმა შეისწავლეს ხელოვნური ინტელექტის საფუძვლები, მანქანური სწავლება (ML), უმაღლესი მათემატიკა და საერთაშორისო ტურნირებისთვის საჭირო პრაქტიკული და სტრატეგიული უნარები.
საქართველოს ტექ ოლიმპიადების ჰაბი BTU-ის ინიციატივით და TBC - თიბისი მხარდაჭერით დაფუძნდა. პროექტის პარტნიორები არიან: UN Women Georgia, საქართველოს ხელოვნური ინტელექტის ასოციაცია • Georgian AI Association • GAIA, Tech Association of Georgia, Lineate Georgia, EPAM Georgia, BLOX • ბლოქსი და McDonald's Georgia.
