TBC Pay - საგადახდო მომსახურების ლიდერი ქართულ ბაზარზე ყოველდღიურად საშუალოდ 150-200 000 მომხმარებელს ვემსახურებით
By არჩილ გელაშვილი •
You're reading Entrepreneur Georgia, an international franchise of Entrepreneur Media.
პანდემიურ პერიოდში განსაკუთრებულად გააქტიურებულმა ელექტრონული კომერციის სფერომ, დისტანციურმა მუშაობამ და ზოგადად, ადამიანებში შეცვლილმა სამომხმარებლო ქცევამ, კიდევ უფრო დააჩქარა სწრაფი და კომფორტული საგადახდო სისტემების, პლატფორმებისა თუ პროვაიდერების განვითარების ტემპი და ნათლად დაგვანახა მათი საჭიროება. საქართველოში გადახდების სერვისის ბაზარზე ერთ-ერთი უმსხვილესი მოთამაშე "თიბისი ჯგუფში" შემავალი TBC Pay გახლავთ, რომელმაც გამოწვევებით აღსავსე უკანასკნელი ორი წლის განმავლობაში, არათუ გაიმყარა პოზიციები ამ ინდუსტრიაში, არამედ გააორმაგა ძალისხმევა და ზრდის წარმოუდგენლად მაღალ მაჩვენებელს მიაღწია.
"თიბისი ფეი" უკვე ორ წელიწადზე მეტია, რაც Agile ტრანსფორმაციის აქტიურ ფაზაშია და ქართულ რეალობაში სრულიად ინოვაციური მიდგომების, პროდუქტებისა თუ მომსახურების სტანდარტის დანერგვაზე მუშაობს. კომპანიის განვითარების მიმართულების, გამოწვევებისა და მიღწევების შესახებ, Entrepreneur "თიბისი ფეის" დირექტორს, ირაკლი ხატიაშვილს ესაუბრა.
ვიდრე უშუალოდ TBC Pay-ის შევეხებოდეთ, გთხოვთ გვიამბოთ, რა ვითარებაა დღესდღეობით საქართველოში გადახდების მომსახურების ბაზარზე? რამდენად კონკურენტულია გარემო, რა მიმართულებით ვვითარდებით?
საქართველოში მოქმედი საგადახდო მომსახურების პროვაიდერები, ეროვნული ბანკის მიერ რეგულირებული სუბიექტები ვართ, რომლებიც კონკრეტულ საკანონმდებლო ჩარჩოებში ვოპერირებთ. ეს ბაზარი საკმაოდ კონკურენტული და გაჯერებულია, ვინაიდან წარმოდგენილნი არიან როგორც მეტ-ნაკლებად მსხვილი კომპანიები, ისე შედარებით მცირე ორგანიზაციები და რაც ყველაზე მნიშვნელოვანია, სწორედ ამავე ბაზარზე ოპერირებენ კომერციული ბანკებიც, რომლებიც საგადახდო სისტემაში არიან ჩართული.
გარდა იმისა, რომ ბაზარი კონკურენტულია, იგი საკმაოდ მომთხოვნიცაა. საზოგადოებაში უკვე დამკვიდრდა ტერმინი "სწრაფი გადახდები", რაც თავის დროს ბაზარზე შემოსულმა თვითმომსახურების ტერმინალებმაც განაპირობა. დღეს მომხმარებელი ეძებს სისწრაფეს, კომფორტსა და მოქნილობას, რაც საგადახდო მომსახურების ბაზარზე ყველაზე ნათლად ჩანს.
ამიტომ, ვფიქრობ, ეს ბაზარი სწორედ მაქსიმალური სისწრაფის მიღწევისა და მომხმარებლისათვის საუკეთესო გამოცდილების შექმნისკენ ვითარდება.
რა გამოარჩევს "თიბისი ფეის" ქართულ ბაზარზე? რა არის კომპანიის მთავარი ღირებულებები და ფასეულობები, რაც თქვენს იდენტობას უსვამს ხაზს?
უპირველეს ყოვლისა, TBC Pay-ის გამოარჩევს ის ძლიერი ბრენდი, რომელიც მან "თიბისი ჯგუფთან" ერთად წლების განმავლობაში აშენა. მომავალ წელს, TBC Pay-ის ბაზარზე ოპერირების 15 წელი უსრულდება და ამ პერიოდის განმავლობაში კომპანიამ თავი დაიმკვიდრა საიმედო პარტნიორის სახით. გარდა ამისა, უნდა აღვნიშნო, რომ ჩვენი მთავარი ღირებულება და ფასეულობა ადამიანები არიან, რომლებიც ამ კომპანიაში მუშაობენ და პერსონები, რომელთაც ჩვენ ვემსახურებით.
ყოველდღიურად საშუალოდ 150-200 ათას მომხმარებელს ვემსახურებით ჩვენი ქსელის საშუალებით. აქედან გამომდინარე, ჩვენი ოპერირების მასშტაბი უდიდეს პასუხისმგებლობას გვაკისრებს − მთელი ქვეყნის მოსახლეობას სწრაფი და ხარისხიანი მომსახურება მივაწოდოთ. შესაბამისად, TBC Pay-ის მთავარი მისია იმაში მდგომარეობს, რომ ადამიანებისთვის ცხოვრების გამარტივების საქმეში, ჩვენი წვლილი შევიტანოთ.
რა სახის პროდუქტსა და სერვისს სთავაზობს TBC Pay მომხმარებელს? რა ხელშესახებ სარგებელს იღებს მომხმარებელი თქვენს პლატფორმასთან ურთიერთობით?
დღეს, ბევრი მომხმარებლისათვის შესაძლოა სწრაფი გადახდის აპარატების ბიზნესთან ვასოცირდებოდეთ, თუმცა ჩვენი ბიზნესი მხოლოდ ამით არ შემოიფარგლება. ამ ეტაპზე, ქვეყნის მასშტაბით 4000-ზე მეტი თვითმომსახურების ტერმინალი გვაქვს და როგორც ფიზიკურ, ისე იურიდიულ პირებს ვთავაზობთ ნებისმიერი ტიპის გადახდას − იქნება ეს კომუნალური ხარჯები, მობილურზე ანგარიშის შევსება, სწავლის გადასახადის დაფარვა, მომსახურების სააგენტოში რიგის დაჯავშნა და ა.შ. მაგრამ ეს ჩვენი საქმიანობის მხოლოდ ერთი ნაწილია. გარდა ამისა, მომხმარებლებს ვთავაზობთ ონლაინ პლატფორმებს, ვებგვერდისა და მობილური აპლიკაციის სახით, რომელთა საშუალებით მათ ყველა იმ 1000-მდე სერვისის მიღება შეუძლიათ, რომელსაც სწრაფი ჩარიცხვის აპარატით იღებდნენ, რაც მომხმარებელს დიდ თავისუფლებას ანიჭებს და დროს უზოგავს.
"თიბისი ფეის" საშუალებით, მომხმარებელი არა მარტო იხდის სხვადასხვა მომსახურების საფასურს, არამედ შეუძლია სხვადასხვა ბანკის ანგარიშებზე შეიტანოს თანხა, რაც ჩვენს აუდიტორიას არ ზღუდავს კონკრეტული ბანკის სეგმენტით და აფართოებს მომსახურების მასშტაბს.
ჩვენი პლატფორმით სარგებლობისათვის არაა აუცილებელი "თიბისი ბანკის" ანგარიშის ან ბარათი გქონდეთ. ჩვენი სერვისებით სხვადასხვა ბანკის მომხმარებლებიც სარგებლობენ და ჩვენი მიზანიც სწორედ ესაა, ამ არხებით შევძლოთ ნებისმიერი ბანკის კლიენტის მომსახურება საქართველოს მასშტაბით. ასევე, ჩვენი ონლაინარხების საშუალებით უცხოური საბანკო ბარათის მფლობელებსაც ვაძლევთ დაახლოებით 200-მდე სერვისის გადახდის შესაძლებლობას.
გარდა ფიზიკური პირების მომსახურებისა, TBC Pay ბიზნესებსაც ეხმარება მათი ფინანსების ორგანიზებაში. დიდ დროსა და რესურსს ვუთმობთ მცირე თუ მსხვილი ადგილობრივი ბიზნესების ხელშეწყობას, როგორც გადახდების მიღებაში, ისე ანგარიშსწორების წარმოებაში. შესაბამისად, სხვა კომპანიებსაც შეუძლიათ ჩვენ მიერ აწყობილი სერვისებით ისარგებლონ და გაცილებით მარტივად თვითონაც დაიწყონ გადახდების მიღება ჩვენი არხის საშუალებით. ერთ-ერთი, რაც ჩვენს კომპანიას ბაზარზე გამოარჩევს, საკმაოდ გამარტივებული გადახდების მიღებისთვის საჭირო ინტეგრაციებია − როგორც ტექნიკურად, ისე იურიდიულად. სხვა კომპანიებისგან განსხვავებით, სადაც პატარა ან მსხვილი ბიზნესების ინტეგრაციამ საგადახდო სისტემაში შესაძლოა კვირები ან თვეები წაიღოს, TBC Pay-სთან ეს პროცესი 3-5 სამუშაო დღეში სრულდება, რაც ბიზნესმომხმარებლებს (მსხვილი, საშუალო თუ მცირე ბიზნესები და სტარტაპები) უმარტივებს სხვადასხვა ტიპის გადახდების მიღებას. პანდემიის დროს განსაკუთრებით გაიზარდა მომართვიანობა მსგავსი სერვისის დანერგვასთან დაკავშირებით, რამაც დამატებითი მუხტი მოგვცა ამ კუთხით აქტიური მუშაობის დასაწყებად.
მიუხედავად იმისა, რომ "თიბისი ჯგუფის" შვილობილი კომპანია გახლავართ, დამოუკიდებლები ვართ და გვაქვს ჩვენი ბიზნესმიზნები, რომელთა ფარგლებშიც გვსურს მაქსიმალურად მეტი მომხმარებლის მოზიდვა, სერვისისა და პროდუქტების გამარტივება და მაღალი მოქნილობის მიღწევა.
როგორც ვიცით, TBC Pay უკვე დაახლოებით ორი წელია, რაც მნიშვნელოვანი ტრანსფორმაციის გზას ადგას. გთხოვთ გვიამბოთ, რა მიმართულების ფუნდამენტურ ცვლილებებზეა საუბარი და რა ეტაპზეა კომპანია ამჟამად?
დაახლოებით ორი წლის წინ კომპანიაში დაიწყო AGILE-ტრანსფორმაციის მნიშვნელოვანი პროცესი, რომელიც პროდუქტების განვითარებას და სერვისების გაუმჯობესებას ისახავს მიზნად. შეიქმნა რამდენიმე AGILE-გუნდი, რომელთაც აქვთ მაქსიმალური დამოუკიდებლობა ამოცანის განსაზღვრისა და მათი შესრულების პროცესისას. ისინი თავად ახორციელებენ აუცილებელი რესურსის მობილიზებას კონკრეტული ამოცანის გარშემო და მას შემდეგ, რაც ამოცანა შესრულდება, იწყება ახალი პროდუქტის გარშემო გუნდის ფორმირება, რომელიც იქნება თვითმყოფადი და მაქსიმალურად ოპერატიულად მოახერხებს პროდუქტის განვითარებასა და სრულყოფას.
ზოგადად, თანამედროვე, განსაკუთრებით კი ტექნოლოგიურ კომპანიებში, ტრანსფორმაციის პროცესი განგრძობითია და მუდმივად ვმუშაობთ ხარისხისა და სისწრაფის მაქსიმიზაციაზე. დღესდღეობით, შეიძლება ითქვას, რომ AGILE ტრანსფორმაციის მნიშვნელოვანი ეტაპი გავიარეთ, თუმცა თავად ამ მიდგომის ფილოსოფია გულისხმობს მუდმივ და სისტემატურ მოქნილობას და ახალ გამოწვევებთან ადაპტაციას. შესაბამისად, ეს სასრული პროცესი ვერ იქნება. ცხადია, ამ გზაზე იყო გამოწვევებიც, რომლებიც ნებისმიერ ტრანსფორმაციას ახლავს. საწყის ეტაპზე AGILE-გუნდებში სხვადასხვა პროფილის ადამიანებს ერთმანეთთან საუბარი, საერთო ენის გამონახვა უჭირთ, ვინაიდან სრულიად განსხვავებულ პროფესიებს წარმოადგენენ. თუმცა გარკვეული პერიოდის შემდეგ, როდესაც გუნდი ერთი მიზნის გარშემო კონცენტრირდება და საერთო ამოცანაზეა ორიენტირებული, კომუნიკაციის პრობლემაც თავისთავად იხსნება.
ერთ-ერთი მთავარი გამოწვევა დღეს ტექნოლოგიურ ბაზარზე ადამიანური რესურსის ნაკლებობაა. პანდემიის შედეგად დისტანციურმა მუშაობამ უცხოური კომპანიებისთვის ადგილობრივი ბაზრის ათვისების ბევრი შესაძლებლობა გააჩინა, რამაც თავისთავად კონკურენცია უფრო გაამძაფრა. ჩვენც გვიწევს ამ გამოწვევებთან ადაპტაცია და მუდმივად ვცდილობთ კონკრეტულ გამოწვევას პასუხი გავცეთ.
ვინაიდან შრომით ბაზარზე არსებულ პრობლემებს შეეხეთ, საინტერესოა, როგორია თავად "თიბისი ფეის" რეკრუტინგული პოლიტიკა? როგორ აგყავთ ახალი კადრები და როგორ ზრუნავთ არსებული პროფესიონალების განვითარებაზე?
მინდა აღვნიშნო, რომ პანდემიის დროს კომპანიამ არათუ შეამცირა კადრები, არამედ პირიქით − თანამშრომელთა რაოდენობა გაზარდა. ჩვენი თანამშრომლების უმეტესობა დისტანციურად ვერ იმუშავებდა და მათ საკმაოდ დიდი წვლილი შეიტანეს მომხმარებლისთვის უწყვეტი და შეუფერხებელი საგადახდო მომსახურების უზრუნველყოფაში. პანდემიის პერიოდში მომხმარებლებმა TBC Pay-ის პროდუქტების გამოყენება უფრო აქტიურად დაიწყეს, მათ შორის თვითმომსახურების ტერმინალების. სწორედ ამიტომ, ჩვენი თანამშრომლების დამსახურებაა, რომ ასეთ რთულ დროს მომხმარებლებისათვის კრიტიკულად მნიშვნელოვანი სერვისების მიწოდება შეუფერხებლად მოხდა, გაიზარდა ჩვენი ქსელი და დაფარვა. ამ ორი წლის განმავლობაში შეიქმნა ახალი პოზიციები, დასაქმდა სრულიად სხვადასხვა პროფილის ადამიანი და კომპანიაც გაიზარდა.
TBC Pay-ის რეკრუტინგს რაც შეეხება, ჩვენ ფაქტობრივად ნებისმიერი გამოცდილების კადრი აგვყავს. ხშირად კანდიდატებს ჰგონიათ, რომ დიდი გამოცდილება უნდა ჰქონდეთ მუშაობის დასაწყებად, თუმცა ჩვენთან ნებისმიერი დონის თეორიული თუ პრაქტიკული ცოდნის ადამიანს შეუძლია მოძებნოს საკუთარი ადგილი. TBC Pay-ის ადამიანური რესურსების სამსახური ხშირად დადის შრომით ბაზრობებზე, უნივერსიტეტებში და გამოფენებზე, სადაც ატარებენ პრეზენტაციებს, აცნობენ ჩვენს კომპანიას, იმ ფინანსურ თუ პროფესიული განვითარების შესაძლებლობებს, რასაც ჩვენთან მუშაობით მიიღებენ. როგორც ნებისმიერ სხვა ტექნოლოგიურ კომპანიას, გვიწევს კვალიფიციური კადრისთვის კონკურენციაში ჩაბმა, გვიწევს სხვა კომპანიიდან თანამშრომლების მოძიება, შესაძლოა ეს იყოს ჩვენ მიერ გაზრდილი კადრები, რომლებიც მრავალი წელია აქ მუშაობენ. მუდმივად გვაქვს ღია დიალოგი ჩვენს თანამშრომლებთან და კომპანია ყოველთვის მოხარულია, როდესაც მათ განვითარება სურთ, რისთვისაც ამ ადამიანებისთვის ხშირად ვაფინანსებთ სხვადასხვა სემინარებსა და ტრენინგებს.
ამჟამად, ვცდილობთ ამ საკითხს უფრო აკადემიური სახე მივცეთ და მოწვეულ ექსპერტებთან ერთად დავიწყეთ განვითარების გეგმის შემუშავება, რამაც თითოეულ თანამშრომელს მეტ-ნაკლებად უფრო კონკრეტული კარიერული განვითარების ხედვა უნდა მისცეს; უნდა დაანახოს, თუ რა ტიპის ტექნიკური თუ პიროვნული უნარები უნდა განავითარონ წარმატებული კარიერის შესაქმნელად.
გაგვაცანით სიახლეები, რომლებსაც TBC Pay ჰპირდება მომხმარებელს სამომხმარებლო გამოცდილების გაუმჯობესების კუთხით?
ჩვენთან სამომხმარებლო გამოცდილება, ისევე, როგორც ნებისმიერ სხვა მომსახურების ბიზნესში, არის ის, რისთვისაც მომხმარებლები ჩვენთან მოდიან. შესაბამისად, მუდმივად ვცდილობთ, მომსახურების ხარისხი გავაუმჯობესოთ და ამ მიმართულებით დიდძალ სამუშაოს ვწევთ. ვცდილობთ თითოეული პროდუქტის ჭრილში გავიაროთ ის გზა, რომელსაც მომხმარებელი გადის და ეს გზა მაქსიმალურად ინტუიციური და მარტივი გავხადოთ.
დღეს მომხმარებლისთვის ციფრული პროდუქტის სიმარტივე და მოქნილობა კრიტიკულად მნიშვნელოვანი ფაქტორებია და ამ მიმართულებით ძალიან ბევრს ვმუშაობთ. ამჟამად, წამოწყებული გვაქვს ერთი დიდი პროექტი, რომლის ფარგლებშიც ტერმინალებისა და აპლიკაციის იერსახე არა ცალკეული გადახდის კუთხით, არამედ მთლიანობაში საგრძნობლად გამარტივდება. აგრეთვე, სულ ახლახან საქართველოს ეროვნულმა ბანკმა მიიღო გარკვეული საკანონმდებლო ცვლილებები, რომლებიც მალე ამოქმედდება და საგადახდო მომსახურების პროვაიდერებს დამატებითი სერვისების შეთავაზების შესაძლებლობას აძლევს. დეტალებზე საუბრისგან ამ ეტაპზე თავს შევიკავებ, თუმცა ვიტყვი, რომ ახლო მომავალში მომხმარებლებს საინტერესო ცვლილებები ელით.
გაუზიარეთ ჩვენს მკითხველს TBC Pay-ის განვითარების ვექტორი და უახლოესი სამომავლო გეგმები.
TBC Pay-ს მთავარი განვითარების ვექტორი არის ჩვენი პროდუქტების დივერსიფიკაცია, რათა მომხმარებლებს მაქსიმალურად მათზე მორგებული პროდუქტი შევთავაზოთ. ამჟამად აქტიურად ვმუშაობთ აპლიკაციისა და ტერმინალების განახლებისა და გამარტივების მიმართულებით, რათა ჩვენი სერვისების გამოყენება სხვა ბიზნესებისათვის კიდევ უფრო გავამარტივოთ; Open API-ს შეთავაზებით, მცირე თუ მსხვილი ბიზნესებისათვის კიდევ უფრო ხელმისაწვდომი და კომფორტული გავხადოთ გადახდების მიღება.
როგორც აღვნიშნე, ჩვენი ქსელი დღეში 150-200 ათას ადამიანს ემსახურება. თუკი ამ მაჩვენებელს დროში "გადავთარგმნით", დავინახავთ, თუ რა დროს ატარებს მომხმარებელი ჯამურად ჩვენს არხებში. ეს საკმაოდ დიდი დროა და სამომხმარებლო გამოცდილების გაუმჯობესება ამ კუთხით სწორედ ამ ერთადერთ მიზანს ემსახურება − მომხმარებლებს ტრანზაქციული საქმიანობის დრო შევუმციროთ და მეტი დრო დავუტოვოთ პირადი თუ ბიზნესსაქმიანობისთვის. ჩვენ ვმუშაობთ იმაზე, რომ საკუთარ მომხმარებლებს შევუქმნათ საუკეთესო სამომხმარებლო გამოცდილება და შევთავაზოთ პროდუქტების ნაირსახეობა.
