ტექნოლოგიების ყოველწლიური ფესტივალი სილიკონ ველი თბილისში სილიკონ ველი თბილისის ტერიტორიაზე საქართველოში ტექნოლოგიების პირველი ფესტივალი გაიმართა

26 მარტს, სილიკონ ველი თბილისის ტერიტორიაზე მეოთხე ინდუსტრიული რევოლუცია საქართველოში ტექნოლოგიების პირველი ფესტივალი გაიმართა. ბიზნესისა და ტექნოლოგიების უნივერსიტეტის და საქართველოს ინოვაციებისა და ტექნოლოგიების სააგენტოს პარტნიორობის ფარგლებში, საქართველოს პირველი ტექნოლოგიური ფესტივალისთვის, მსოფლიოს მოწინავე ტექნოლოგიური ბრენდები, ტექ-სტარტაპერები და საქართველოს ლიდერი აიტი კომპანიები, ერთ სივრცეში, ტექნოლოგიების უახლესი ტრენდების გარშემო გაერთიანდნენ.

მე-4 ინდუსტრიული რევოლუციის პირობებში, ტექნოლოგიების ინტეგრირება ბიზნეს პროცესებში ძალიან სწრაფი ტემპით მიმდინარეობს. ეს ტემპი მზარდია საქართველოშიც: ხელოვნური ინტელექტი, მანქანური სწავლება, ვირტუალური და გაფართოებული რეალობა და სხვა ტექნოლოგიური ტრენდები, სტარტაპებებში, მცირე, საშუალო და მსხვილ ბიზნესში, საქართველოს ყველა ინდუსტრიაში ჩნდება.
ბიზნესისა და ტექნოლოგიების უნივერსიტეტი მოწინავე პოზიციას იკავებს ამ მიმართულებით ინდუსტრიის მხარდაჭერის და სამეწარმეო ეკოსისტემის ფორმულირების მიმართულებით.

"ყველა ბიზნესი გახდება ტექნოლოგია" - ამ სიტყვებით 2019 წელს გაიხსნა მსოფლიოს ყოველწლიური ეკონომიკური ფორუმი დავოსში და სწორედ ამ ორი მიმართულების ინტეგრირებას რეგიონში ემსახურება საქართველოს ტექნოლოგიების ფესტივალი. ფესტივალზე წარმოდგენილი იყო ყველა საერთაშორისო ტექბრენდი, რომელიც საქართველოში ოპერირებს, მსოფლიოს უახლესი ტექნოლოგიური გადაწყვეტილებები და ყველაზე მაღალტექნოლოგიური ქართული სტარტაპები.

ფესტივალის ფარგლებში გაიმართა პანელური დისკუსია სახელწოდებით "სამეწარმეო ეკოსისტემის ფორმულირება საქართველოში, სახელმწიფოს და კერძო სექტორის როლი". დისკუსიაში მონაწილეობა მიიღო 20-მდე კომპანიამ, მათ შორის: VREX, Spark • სპარკი, Edison, Shelf Network, Pulsar AI, Smarter.ge, ინოვაციური განათლების ფონდი, Techub, BogFintech, TTM, impacthub, Copter tech, ინოვაციების ხელშეწყობის ფონდი და ა.შ.

TechTalks -ის ფარგლებში კი განხილული იყო მსოფლიოში არსებული უახლესი ტექნოლოგიური ტრენდები, ასევე მსოფლიოს ეკონომიკური ფორუმის ტექტრენდების ანალიზი. მათ შორის, საუბარი შეეხო ხელოვნური ინტელექტს და მანქანურ სწავლებას, ბლოკჩეინ ტექნოლოგიას, გაფართოებულ და ვირტუალურ რეალობას, შენობა ნაგებობების ავტომატიზირებას და ჭკვიან ტექნოლოგიებს სამშენებლო სფეროში. ფესტივალის ფარგლებში მოეწყო მსოფლიოს უახლესი ტექნოლოგიური გადაწყვეტილებების გამოფენა, სადაც წარმოდგენელი იყო ისეთი კომპანიები, როგორიცაა - HP, IBM, Lenovo, DELL, Microsoft, HP Enterprise, Syntax, Spectre, Orient Logic, LAB, MUK, BETA, Allmarket, GRENA, Bitfury, Techub, Edison, Shelf network, Vrex, Pulsar AI, smarter.ge, Copter Tech, HTS. უახლესი software/hardware გადაწყვეტილებების ექსპოზიციითა და ბრენდების სტენდებით. ტექნოლოგიურმა კომპანიებმა პროექტ დაასაქმე Smart სტუდენტის ფარგლებში სტუდენტური ვაკანსიები წარადგინეს.

ნინო ენუქიძე, ბიზნესისა და ტექნოლოგიების უნივერსიტეტის დეკანი: "ვგეგმავთ ფესტივალი იყოს ყოველწლიური. მაღალი ინტერესიდან გამომდინარე, ვფიქრობთ პანელურ დისკუსიებს მივცეთ სისტემური ხასიათი - ეს იქნება სამუშაო შეხვედრები, რომელიც ჩვენს კურიკულუმზეც იქონიებს გავლენას, რათა უნივერსიტეტში მუდმივად განახლებული სწავლების პროცესი და მეთოდი გვქონდეს დანერგილი. გვაქვს ძალიან სასიხარულო სიახლეც - ისრაელის ტექჰაბის ინიცირებით, სილიკონ ველი თბილისში დაფუძნდება გლობალური სტარტაპ ფონდი, რომელიც გულისხმობს, ისრაელის ყველაზე მსხვილი ინვესტორების საქართველოში ჩამოსვლას, სტარტაპების დაფინანსებას და მათი საერთაშორისო ბაზარზე კომერციალიზაციის ხელშეწყობას. ამისთვის მრავალმილიონიანი ფონდია გამოყოფილი და საუბარია ყველა ტექნოლოგიური მიმართულების ხელშეწყობაზე, განურჩევლად სფეროსი".

ავთანდილ კასრაძე, საქართველოს ინოვაციების და ტექნოლოგიების სააგენტოს ხელმძღვანელი: "მნიშვნელოვანია რომ ბიზნესისა და ტექნოლოგიების უნივერსიტეტი არის მთავარი ორგანიზატორი და ინიციატორი ამ ფესტივალის, რაც სტუდენტების მაქსიმალურ დაინტერესებას გულისხმობს ინოვაციებისა და ტექნოლოგიებისადმი. სწორედ უნივერსიტეტებში და სტუდენტებში იწყება ის მთავარი სიახლეები, რომელსაც შეუძლია საქართველო მსოფლიო ტექნოლოგიურ რუკაზე დაამკვიდროს. ნებისმიერი ასეთი სახის ინიციატივა რომელიც უნივერსიტეტიდან და კერძო სექტორიდან მოდის, ეკონომოიკის სამინიტრო და ინოვაციებისა და ტექნოლოგიების სააგენტო მხარდამჭერი იქნება მუდმივად ამ პროცესის".