MyDataNinja - ციფრული მარკეტინგის მართვის სრული კომპლექტი ერთ სივრცეში
You're reading Entrepreneur Georgia, an international franchise of Entrepreneur Media.
არავისთვისაა გასაკვირი, რომ მარკეტინგი შემოთავაზებების შექმნის, კომუნიკაციის, მიწოდებისა და გაცვლის პროცესს წარმოადგენს, რომელსაც აქვს ღირებულება მომხმარებლებისთვის, კლიენტებისთვის, პარტნიორებისთვისა და ზოგადად, საზოგადოებისთვის. მარკეტინგი შეიძლება განხორციელდეს სხვადასხვა არხით, მათ შორის რეკლამის, საზოგადოებასთან ურთიერთობის, სოციალური მედიისა და პირდაპირი მარკეტინგის საშუალებით.
თუმცა სხვადასხვა პლატფორმაზე ციფრული რეკლამის გაშვება რთულ და შრომატევად პროცესს წარმოადგენს: ბიზნესს უწევს თითოეული პლატფორმისთვის ცალკეული კამპანიების შექმნა და მართვა, რის გამო ხშირად საჭირო ხდება სხვადასხვა ხელსაწყოსა და პროგრამული უზრუნველყოფის გამოყენება. ამ უკანასკნელმა კი გაართულა მათი კამპანიების შესრულებისთვის თვალყურის დევნება.
MyDataNinja პირველი ქართული სტარტაპია, რომელმაც შეძლო და მნიშვნელოვნად გაამარტივა აღნიშნული პროცესი. პლატფორმის მიზანია დაეხმაროს ყველა ზომის ბიზნესს, დაზოგოს დრო და ფული ისეთი ამოცანების ავტომატიზაციის გზით, როგორიცაა რეკლამის შექმნა, კამპანიის მართვა და მოხსენება.
2020 წელს დაარსებული სტარტაპი შექმნილია მარტივად გამოსაყენებლად, თუნდაც იმ ბიზნესებისთვის, რომლებსაც არ აქვთ დიდი გამოცდილება ციფრული მარკეტინგის სფეროში. პლატფორმა იყენებს მოქნილ ინტერფეისს, რათა გაადვილდეს რეკლამის შექმნა და მართვა. გარდა ამისა, MyDataNinja გთავაზობთ დეტალურ ანგარიშს მარკეტინგული კამპანიების შესრულების შესახებ, რათა ბიზნესი გაეცნოს, რა მუშაობს და რა არა.
MyDataNinja-ს შეუძლია დაეხმაროს ბიზნესებს დროის დაზოგვაში ისეთი ამოცანების ავტომატიზაციის გზით, როგორიცაა რეკლამის შექმნა და კამპანიის მართვა. აღნიშნული პლატფორმა იდეალური სერვისია იმ ბიზნესებისთვის, რომლებიც ცდილობენ დაზოგონ დრო, ფული და გააუმჯობესონ მარკეტინგული კამპანიების განხორციელება. პლატფორმა მარტივი გამოსაყენებელია და გთავაზობთ უამრავ მახასიათებელს, რაც დაგეხმარებათ თქვენი მარკეტინგის მომდევნო დონეზე გასაუმჯობესებლად.
მნიშვნელოვანია არ გამოგვრჩეს ისიც, რომ 2020 წელს MyDataNinja GITA-ს 150 000 ლარიანი გრანტის მფლობელი გახდა. ამავდროულად იგი USAID-ის რჩეული სტარტაპია, რის საშუალებითაც უახლოეს მომავალში MyDataNinja სტარტაპ-აქსელერატორის ეტაპს კალიფორნიაში, სილიკონ ველიზე გაივლის.
რას გეგმავს სამომავლოდ აღნიშნული სტარტაპი და განვითარების როგორი პოტენციალი აქვს მას? − ამის შესახებ Entrepreneur Georgia MyDataNinja-ს დამფუძნებელს, გურამ თათეშვილს ესაუბრა.
მოგვიყევით, რა მიზეზების გამო მიიღეთ გადაწყვეტილება, შეგექმნათ MyDataNinja?
გადაწყვეტილება მივიღეთ მას შემდეგ, რაც ჩვენს ციფრულ სარეკლამო სააგენტოში (რომელიც ახლა უკვე Google-ის ოფიციალური პარტნიორია), დავნერგეთ მსგავსი შიდა აპლიკაცია. ამან დიდი წარმატება მოუტანა როგორც ჩვენს კლიენტებს, ასევე ჩვენ, რადგან საშუალება მოგვცა ნაკლები ძალისხმევით, ავტომატიზაციის ხარჯზე, ბევრად უკეთესი შედეგები გვქონოდა. გადავწყვიტეთ, აღნიშნული შიდა აპლიკაცია ფართო მასებისთვისაც ყოფილიყო ხელმისაწვდომი, ამიტომაც შევქმენით MyDataNinja. ამის შემდეგ იყო ბევრი ტექნიკური თუ არატექნიკური პრობლემა და ახლა ვართ იმ ეტაპზე, როცა ვაპირებთ საჯარო ბეტა-ვერსიის გაშვებას.
დეტალურად აღწერეთ, რა ტიპის კონკრეტული პრობლემის გადაჭრას ემსახურება თქვენი სტარტაპი?
მცირე და საშუალო ბიზნესს, რომელსაც ხშირად სარეკლამო ბიუჯეტი არც ისე დიდი აქვს და სურს მისი სრულად ეფექტიანად დახარჯვა, ხშირად უჭირს დაადგინოს, ზუსტად რომელი პროდუქტი და რეკლამა მუშაობს კარგად და რომელი − არა. ჩვენი სისტემის მეშვეობით, მომხმარებელს შეუძლია რეალურ დროში გაეცნოს, რომელი სარეკლამო კამპანიებია მომგებიანი და რომელი − არა. შესაბამისად, რეალურ დროში გათიშოს ცუდად მომუშავე რეკლამები და ეს ბიუჯეტი გადაიტანოს წარმატებულზე, რაც ციფრებში არნახულ შედეგს გვაძლევს.
ბევრი სარეკლამო პლატფორმის მართვა არც ისე მარტივია, ჩვენი პლატფორმის მეშვეობით კი, ერთიან სივრცეში შეგიძლიათ ნახოთ როგორც Google-ის, ასევე Facebook-ის ასობით სარეკლამო ანგარიშის ინფორმაცია, მართოთ ისინი მარტივად და გახდეთ ბევრად მოქნილი. ეს კი დაგიზოგავთ როგორც დროს, ასევე ბიუჯეტს.
ხშირად, კომპანიის ხელმძღვანელებს უჭირთ გაგება, რამდენად კარგად მუშაობს მათი ციფრული მარკეტინგი. MyDataNinja-ს მეშვეობით კი, მაღალი რგოლის მენეჯერებსაც შეუძლიათ მიიღონ მარტივი უკუკავშირი რეალურ დროში, თუ რა ROI აქვს მათ ციფრულ სარეკლამო კამპანიებს, ჩაშლილად როგორც პლატფორმების, ასევე ანგარიშებისა და პროდუქტების დონეზე.
განვითარების რომელ ეტაპზეა MyDataNinja და რა სამომავლო გეგმები აქვს სტარტაპს?
ჩვენი კომპანია ახლა გადადის დახურული ბეტა-რეჟიმიდან, სადაც რამდენიმე კომპანია სარგებლობდა ხელსაწყოთი, საჯარო ბეტა-ვერსიაზე. ამიერიდან შევძლებთ ჩავრთოთ და მოვემსახუროთ უფრო მეტ კომპანიას, თანაც შეღავათიანი ფასის პირობებში, რადგან ვიდრე საჯარო ბეტა-ვერსიაზე ვიქნებით, ყოველთვიური გადასახადი გვექნება ფიქსირებული. ამ ეტაპზე მნიშვნელოვანია მივიღოთ მომხმარებლის უკუკავშირი, თუ რა სახის ფუნქციები და მომსახურებები სჭირდებათ. ასევე, საჯარო ბეტას პირობებში, დავეხმარებით შერჩეულ კომპანიებს უფასო ინტეგრაციაში.
რაც შეეხება სამომავლო გეგმებს − ჩვენ ვგეგმავთ, რომ მაქსიმუმ რამდენიმე თვის ვადაში გავუშვათ სრული ვერსია, რომელიც მოემსახურება ამერიკელ და ევროპელ კლიენტებს. სრულ ვერსიამდე, გვსურს შევქმნათ მარტივი Plugin-ები დიდ პლატფორმებთან ერთი Click-ით ინტეგრაციისთვის, როგორიცაა Shopify, Hubspot, Zoho, Wix და Wordpress.
ჩვენი მიზანია, მომხმარებელს გავუმარტივოთ ციფრული სარეკლამო სისტემების მართვა. გვსურს, მთავარი მიზანი მათთვის იყოს პროდუქტისა და კრეატივის განვითარება, ხოლო ტექნიკური ნაწილი MyDataNinja-ს მეშვეობით მარტივად გვარდებოდეს.
