უორენ ბაფეტი 40 წლის განმავლობაში ცნობილი იყო 100 000-დოლარიანი ხელფასით. აი, რამდენს აიღებს მისი მემკვიდრე 2026 წელს
By Sherin Shibu
You're reading Entrepreneur Georgia, an international franchise of Entrepreneur Media.
Berkshire Hathaway-ს ახალმა აღმასრულებელმა დირექტორმა, გრეგ აბელმა, თანამდებობა 1-ელ იანვარს დაიკავა. ახალი მარეგულირებელი დოკუმენტებიდან ირკვევა, რომ წელს აღმასრულებელი დირექტორის წლიური ფულადი ხელფასი 25 მილიონი დოლარი იქნება. ეს 19%-იანი მატებაა იმ 21 მილიონ დოლართან შედარებით, რომელიც მან 2024 წელს Berkshire-ის არასადაზღვევო ბიზნესების კურატორი ვიცე-თავმჯდომარის პოსტზე მიიღო.
ანაზღაურების ეს მოცულობა, რომელიც სამშაბათს აშშ-ის ფასიანი ქაღალდებისა და ბირჟების კომისიაში (SEC) წარდგენილ დოკუმენტში გასაჯაროვდა, აბელის წინამორბედის, უორენ ბაფეტის პრაქტიკისგან მკვეთრად განსხვავდება. ბაფეტი ცნობილი იყო იმით, რომ 40 წლის განმავლობაში მისი წლიური ხელფასი მოკრძალებული 100 000 დოლარი იყო.
2025 წლის ივნისის დოკუმენტაციის თანახმად, ბაფეტი Berkshire-ის აქციების უმსხვილესი კერძო მფლობელია და კომპანიის A კლასის აქციების დაახლოებით 36,4%-ს ფლობს. აღმასრულებელი დირექტორის პოსტზე ყოფნის დროს მას არც ბონუსები აუღია და არც დამატებითი აქციები, რადგან ამტკიცებდა, რომ Berkshire-ში მისი გიგანტური პირადი წილი ისედაც სრულად უთანაბრებდა მის ინტერესებს აქციონერების მიზნებს. სტატიის დაწერის მომენტისთვის იგი მსოფლიოს მე-10 უმდიდრესი ადამიანია 150 მილიარდი დოლარის ქონებით, რომელიც ძირითადად სწორედ Berkshire-ის აქციებისგან შედგება.
აბელის 25-მილიონიანი ფულადი ანაზღაურება ჩრდილავს ბაფეტის 100 000-დოლარიან წლიურ ხელფასს, მიუხედავად იმისა, რომ ბაფეტის მმართველობის პერიოდში Berkshire გაიზარდა და ბევრად უფრო დიდი და რთული სტრუქტურის ორგანიზაციად ჩამოყალიბდა. ამ ნაბიჯით აბელის ანაზღაურება საგრძნობლად აჭარბებს S&P 500-ის კომპანიების აღმასრულებელი დირექტორების საშუალო ანაზღაურებას, რაც 2024 წელს დაახლოებით 18,9 მილიონ დოლარს შეადგენდა.
აბელის დაწინაურება აღმასრულებელი დირექტორის პოზიციაზე ასახავს Berkshire-ში მისი ათწლეულების განმავლობაში დაგროვილ ოპერაციულ გამოცდილებას, განსაკუთრებით Berkshire Hathaway Energy-ში, რომლის ერთ-ერთ უმსხვილეს ამერიკულ ენერგოპროვაიდერად ჩამოყალიბებაში მან მნიშვნელოვანი წვლილი შეიტანა.
ის Berkshire-ს 2000 წელს შეუერთდა, როდესაც კომპანიამ MidAmerican Energy შეისყიდა. 2018 წლიდან მას არასადაზღვევო ოპერაციების ვიცე-თავმჯდომარის პოსტი ეკავა და ახორციელებდა ფართო ზედამხედველობას ბიზნესებზე, დაწყებული რკინიგზით, დამთავრებული სამრეწველო საწარმოებით.
ბაფეტმა აბელს საჯარო მხარდაჭერა არაერთხელ გამოუცხადა. გასულ წელს, აქციონერებისადმი მიწერილ მადლიერების დღის წერილში, ბაფეტმა აბელი შეაქო და მოიხსენია ისეთ ადამიანად, რომელიც ყველაფერს "სწრაფად ითვისებს" და აღნიშნა, რომ აღმასრულებელი დირექტორი Berkshire-ის სამართავად მზად არის.
"ვერ წარმომიდგენია ვერცერთი აღმასრულებელი დირექტორი, მენეჯმენტის კონსულტანტი, აკადემიკოსი თუ მთავრობის წევრი, ვისაც გრეგზე მეტად ვანდობდი თქვენს და ჩემს დანაზოგებს", – წერდა ბაფეტი.
გასულ წელს, Berkshire-ის აქციონერთა ყოველწლიურ კრებაზე, ბაფეტმა განაცხადა, რომ ამ პოსტზე 55-წლიანი მუშაობის შემდეგ, აღმასრულებელი დირექტორის თანამდებობას ტოვებდა. რამდენიმე საათში დირექტორთა საბჭომ ერთხმად დაუჭირა მხარი მის შემცვლელად აბელის დანიშვნას. ბაფეტი კვლავ რჩება Berkshire-ის დირექტორთა საბჭოს თავმჯდომარედ.
მიუხედავად იმისა, რომ აბელის ანაზღაურება ნორმაზე მაღალია, ის მაინც არ არის ყველაზე მაღალანაზღაურებადი პიროვნება ინდუსტრიაში. ნოემბერში Tesla-ს აქციონერებმა დაამტკიცეს რეკორდული, 1-ტრილიონიანი კომპენსაციის გეგმა აღმასრულებელი დირექტორისთვის, ილონ მასკისთვის, რაც მასკისგან გარკვეული ეტაპების მიღწევას მოითხოვს ამ თანხის მისაღებად.
