You can be on Entrepreneur’s cover!

ფსიქოთერაპიის ცენტრი - ადგილი, სადაც უმთავრესი ღირებულება ადამიანის სიცოცხლე და მენტალური ჯანმრთელობაა

Opinions expressed by Entrepreneur contributors are their own.

You're reading Entrepreneur Georgia, an international franchise of Entrepreneur Media.

პომელი

თბილისში 1 ნოემბერს ფილიპ პომელის სახელობის ფრანგული ფსიქოთერაპიის ცენტრი იხსნება. ცენტრის დამფუძნებელი საფრანგეთში მუშაობის 21-წლიანი გამოცდილების მქონე ფსიქიატრი, ფსიქოთერაპევტი და მედიცინის დოქტორი ნინო მენაღარიშვილია. ფსიქოთერაპიის ცენტრი დაინტერესებულ პირებს ორ ძირითად მიმართულებას სთავაზობს − ცენტრი კლინიკური ფსიქოლოგიის მიმართულებით ჩაატარებს როგორც ინდივიდუალურ, ასევე ჯგუფურ თერაპიებს 4 ენაზე (ქართული, ინგლისური, რუსული, ფრანგული). ამასთანავე, მორგებული იქნება ნებისმიერი ასაკის ადამიანის მოთხოვნებზე, ხოლო ფსიქოთერაპიის ცენტრის სასწავლო მიმართულება, რომელშიც ფრანგი კოლეგებიც ჩაერთვებიან, ფსიქოლოგებს კვალიფიკაციის ამაღლებაში დაეხმარება. ჩვენ დეტალური ინფორმაციისათვის ფილიპ პომელის სახელობის ფრანგული ფსიქოთერაპიის ცენტრის დამფუძნებელ ნინო მენაღარიშვილს გავესაუბრეთ.

რატომ გაგიჩნდათ ფსიქოთერაპიის ცენტრის გახსნის იდეა?
საფრანგეთში მუშაობის პერიოდში, 2018 წელს საქართველოში ჩამოსვლის შემოთავაზება მივიღე და რადგან ეროვნებით ქართველი ვარ და პროექტში ენის ბარიერის არსებობა დაუშვებელი იყო, აქ წელიწადი და 8 თვე გავატარე. საქართველო პოსტსაბჭოთა ქვეყნებს შორისაა, სადაც ისტორიიდან გამომდინარე, მენტალური ჯანმრთელობის სფეროს მეტი ჰუმანიზმი და სტიგმებისგან გათავისუფლება სჭირდება. მოგეხსენებათ, იყო დრო, როცა ფსიქიატრია არა მკურნალ და დამხმარე სფეროდ, არამედ საშიშად და დამსჯელად აღიქმებოდა.

სწორედ ამ დროს გამიჩნდა ფსიქოთერაპიის ცენტრის გახსნის იდეა. ჩემთვის იმ გარემოში დაბრუნება, სადაც ფსიქიატრიასა და მენტალურ ჯანმრთელობასთან დაკავშირებით ძველი სტიგმები და შეხედულებები ისევ შემორჩენილია, გარკვეულწილად ბიძგისმომცემი გახდა. ამიტომ, გადავწყვიტე შემექმნა ცენტრი, რომლის საშუალებითაც საფრანგეთში მუშაობისას მიღებულ ცოდნასა და პრაქტიკას, ეთნიკური თავისებურებების, ტრადიციებისა და სოციალურ-ეკონომიკური მდგომარეობის გათვალისწინებით საქართველოს რეალობას მოვარგებდი. ფსიქოთერაპიის ცენტრი ოფიციალურად 1 ნოემბერს იხსნება, მაგრამ თერაპიაზე ჩაწერა უკვე შესაძლებელია.

გვიამბეთ თქვენი თანადამფუძნებლისა და პარტნიორის შესახებ.
ფსიქოთერაპიის ცენტრის გახსნის იდეა რამდენიმე წლის წინ გამიჩნდა, მაგრამ მის რეალიზებაში ჩემი პარტნიორი და ცენტრის თანადამფუძნებელი − გიორგი ბოკუჩავა დამეხმარა, რადგან მართვის, მენეჯმენტისა და განვითარების მიმართულებაში დიდი გამოცდილება აქვს.

მართალია, ცენტრი კერძო დაწესებულებაა, მაგრამ ის შეუძლებელია მხოლოდ ბიზნესად აღიქვა, რადგან საქმე ადამიანების მენტალურ ჯანმრთელობასა და ფსიქოლოგიურ მდგომარეობას ეხება. ამიტომ, კლინიკური ფსიქოლოგიისა და მართვა/განვითარება/მენეჯმენტის ინტეგრირებით, საუკეთესო შედეგი მიიღწევა. მიმართულებებად დაყოფა და მათზე კონცენტრირება კი ადამიანების მოთხოვნების გაგებაშიც დაგვეხმარება და ცენტრის სრულფასოვნად ფუნქციონირებასაც შეუწყობს ხელს.

რა არის თქვენი ცენტრის მთავარი მიზანი?
ფსიქოთერაპიის ცენტრის მთავარი მიზანი საქართველოში მენტალურ ჯანმრთელობაზე არსებული ხედვის მოდერნიზაცია, სტიგმის მოხსნა და ამ საკითხთან დაკავშირებით საზოგადოების ცნობიერების ამაღლება და განათლებაა.

ცენტრის მთავარი პრიორიტეტი და ღირებულება, ფინანსურ მოგებაზე მეტად (რაც არსებობისთვის აუცილებელია), ადამიანების დახმარება და მათ მენტალურ ჯანმრთელობაზე ზრუნვაა.

გვესაუბრეთ ფსიქოთერაპიის ცენტრის ძირითად სამუშაო მიმართულებებზე.
ფსიქოთერაპიის ცენტრი ორი მიმართულებით იმუშავებს: პირველი, რა თქმა უნდა, კონსულტაციებს გულისხმობს, რაც ანალიტიკურ ფსიქოთერაპიას მოიცავს, რომლის მიზანი საზოგადოების ყველა ასაკობრივი ჯგუფის მოთხოვნების დაკმაყოფილება იქნება. ცენტრში მომუშავე ფსიქოლოგები და ფსიქიატრები ინდივიდუალურ და ჯგუფურ თერაპიებს 4 ენაზე (ქართული, ინგლისური, რუსული, ფრანგული) ჩაატარებენ.

ფსიქოთერაპიის ცენტრში მენტალური ჯანმრთელობის ყველა მიმართულების დიაგნოსტიკა და მკურნალობა განხორციელდება, როგორებიცაა: ნევროზული შფოთვები, მძიმე ფსიქიატრიული პათოლოგიები, კვებითი აშლილობა, პანიკური შეტევები, დეპრესია, ბიპოლარული აშლილობა, ფსიქოზები და სტრესდიაგნოსტიკა. თერაპიის მთავარი მიზანი პიროვნების მენტალური ჯანმრთელობის აღდგენაა, რათა ადამიანმა სოციალური ფუნქცია არ დაკარგოს და საზოგადოებიდან არ გაირიყოს.

მაგალითად, ჯგუფურ თერაპიას მედიცინის მუშაკებთან მუშაობისას გამოვიყენებთ, რომლებიც პაციენტებისგან დიდ აგრესიას იღებენ, ასევე, ვეტერანებთან, რომლებმაც თავის დროზე სამშობლოსთვის საბრძოლველად არაფერი დაიშურეს, ახლა კი თავს უფუნქციოდ და საზოგადოებისგან გარიყულად გრძნობენ.

გვესაუბრეთ ფსიქოთერაპიის ცენტრის სასწავლო პროგრამაზე.
ფსიქოთერაპიის ცენტრის კვალიფიკაციის ასამაღლებელი სასერტიფიკატო ტრენინგცენტრის სასწავლო პროგრამაში ფრანგი კოლეგებიც ჩაერთვებიან და დაინტერესებულ პირებს საკუთარ ცოდნასა და გამოცდილებას გაუზიარებენ.

ტრენინგცენტრის მიზანი ფსიქოლოგების, ინტერნ-ფსიქიატრების, ფსიქიატრიის ექთნებისა და სოცმუშაკების კვალიფიკაციის ამაღლებაზე მუშაობაა.

ომელი ფაქტორები გამოარჩევს ფსიქოთერაპიის ცენტრს?
ჩვენი მთავარი გამოწვევა ფსიქოთერაპიის ჩატარებისას გასათვალისწინებელი ორი მთავარი ფაქტორის − გეოგრაფიული სიახლოვისა და წვდომის უზრუნველყოფაა. გვინდა, ჩვენი ცენტრი ტერიტორიულად და ფინანსურად, საზოგადოების ყველა ჯგუფისთვის ხელმისაწვდომი იყოს.

გარდა ამისა, ფსიქოთერაპიის ცენტრი საფრანგეთის ჰომოლოგთან, პარიზის ერთ-ერთ ფსიქიატრიულ სექტორთან კოლაბორაციაში მუშაობს და იმავე მიდგომების გამოყენებას გეგმავს, რაც საფრანგეთშია.

მოგვიყევით თქვენს სამომავლო გეგმებზე.
ფსიქოთერაპიის ცენტრის სამომავლო გეგმა სუიციდის პრევენციის პროცესში ჩართვაა, რაც იმას გულისხმობს, რომ ცენტრში მომუშავე ფსიქოლოგებსა და პაციენტებს შორის მუდმივად იქნება კომუნიკაცია და ინფორმაციის გაცვლა. თუ ჩვენ გაგვიჩნდება ეჭვი, რომ რომელიღაც პაციენტში არის სუიციდის რისკი, ამ შემთხვევაში პიროვნებას არ მივუდგებით, როგორც ბიზნესის წყაროს, მხოლოდ ფინანსურ რესურსებს არ დავეყრდნობით და აუცილებლად გვექნება ქოლცენტრი, რომელიც დაეკონტაქტება კითხვარში მონიშნულ ნდობით აღჭურვილ პირს, ან მობილური ჯგუფი თავად მივა ადგილზე.

ფილიპ პომელის სახელობის ფრანგული ფსიქოთერაპიის ცენტრისთვის ფინანსურ მოგებაზე მაღლა ადამიანის სიცოცხლე დგას.

Business News

ჯანსაღი კვების რაციონი ნუცა სურგულაძის "ბალანსთან" ერთად

"ბალანსი" მომხმარებელს სთავაზობს კვების სერვისს, რომელშიც თითოეული კერძი სპეციალურადაა შერჩეული

Business News

პროფესია, რომლითაც გლობალურ საერთაშორისო გამოწვევებში ჩაერთვები

ევროპის და ამერიკის უნივერსიტეტების წარმომადგენლები თბილისში, დაინტერესებულ ახალგაზრდებთან შესახვედრად ჩამოდიან