რატომ თიშავს Facebook სახის ამოცნობის სისტემას? ეს პროცესი მომდევნო კვირების განმავლობაში, ეტაპობრივად განხორციელდება
You're reading Entrepreneur Georgia, an international franchise of Entrepreneur Media.
Facebook-ის ქოლგა კომპანიამ - Meta, რომლის წარდგენაც სულ ახლახან შედგა და ასევე, მისმა მრავალრიცხოვანმა შვილობილმა კომპანიებმა განაცხადეს, რომ სახის ამოცნობის სისტემას ეტაპობრივად გააუქმებენ.მომხმარებლებს ამიერიდან არჩევანის გაკეთების შესაძლებლობა ექნებათ და ვინც არ ისურვებს, ფოტოებზე და ვიდეოებზე მისი სახის ავტომატურად ამოცნობას, ამ ფუნქციაზე უარის თქმას შეძლებს, ხოლო პლატფორმა სახის ამოცნობის მილიარდზე მეტ შაბლონს წაშლის.
ამ საკითხზე ოფიციალური განცხადება ჯერომ პესენტიმ გააკეთა, კომპანიის ვიცე-პრეზიდენტმა ხელოვნური ინტელექტის საკითხებში. მისი განცხადების თანახმად, მომხმარებლებს აღარ ექნებათ შესაძლებლობა ავტომატურად მიიღონ შეტყობინება, როდესაც სხვების გამოქვეყნებულ ფოტოებსა და ვიდეოებში გამოჩნდებიან, ან რეკომენდაციები მიიღონ იმის თაობაზე, თუ ვინ უნდა „დათაგონ" ფოტოებზე. ეს ცვლილება ავტომატურ ალტერნატიულ ტექსტზეც (AAT) მოახდენს გავლენას, რომელიც სურათებს აღწერს მხედველობა დაქვეითებული ადამიანებისთვის. AAT უწინდებურად ამოიცნობს რამდენი ადამიანია ფოტოზე, მაგრამ მათ იდენტიფიცირებას აღარ მოახდენს.
მიუხედავად ამისა, სახის ამოცნობის ტექნოლოგია კვლავ იქნება გამოყენებული პირადი მიზნებისათვის და ამის არაერთი მიზეზი არსებობს. „წინ თუ გავიხედავთ, დავინახავთ, რომ მომავალში სახის ამოცნობის ტექნოლოგია კვლავ იარსებებს და თან მძლავრი ინსტრუმენტის სახით. მას მაგალითად, ის ადამიანები გამოიყენებენ, რომლებსაც საკუთარი ვინაობის დადასტურება სჭირდებათ. გარდა ამისა, მისი დახმარებით სხვა პიროვნებად თავის გასაღებისა და თაღლითობის პრევენცია იქნება შესაძლებელი",– წერს პესენტი, – "ჩვენი აზრით, სახის ამოცნობის ტექნოლოგიას კონფიდენციალობის, გამჭვირვალობისა და კონტროლის პირობებში სწორედ ამ ტიპის პროდუქტების დახმარება შეუძლია. ამიტომ, თქვენ თავად უნდა გადაწყვიტოთ, საერთოდ გამოიყენებთ თუ არა ამ ფუნქციას და როგორ გამოიყენებთ მას. ჩვენ გავაგრძელებთ ამ ტექნოლოგიებზე მუშაობას და მასში გარე ექსპერტებსაც ჩავრთავთ".
ხსენებული პოსტის მიხედვით, ეს ცვლილება იმას ნიშნავს, რომ „მთელი კომპანია პიროვნების ამ ტიპის ფართო იდენტიფიკაციიდან ავტორიზაციის უფრო ვიწრო ფორმებზე გადადის". პესენტიმ დაწერა, რომ სახის ამოცნობის შესაძლებლობის შეზღუდვა სწორი ნაბიჯი იყო. რადგან საზოგადოებაში ჯერ კიდევ გაურკვევლობაა იმის გამო, რომ ამ სფეროში მკაცრი რეგულაციები არ არსებობს და კონფიდენციალობის საკითხებშიც პრობლემებია.
ეს განცხადება დაახლოებით ერთი თვის შემდეგ გაკეთდა, რაც Facebook-ის მამხილებელმა ფრენსის ჰაუგენმა Wall Street Journal-სა და კონგრესში კომპანიის შიდა დოკუმენტები წარადგინა, რომლებიც ავლენს, რომ პლატფორმამ იცოდა, თუ რა საზიანო შედეგები მოჰქონდა მას. Facebook-ის აღმასრულებელმა დირექტორმა მარკ ზაკერბერგმა მოგვიანებით გააკეთა საკმაოდ მკვეთრი კომენტარი, რომ "ღრმად ალოგიკურია ბრალდება, თითქოს კომპანია მოგების გამო, განზრახ უკეთებს პოპულარიზაციას ინფორმაციას, რომელიც ადამიანებს აბრაზებს"
