3 გზა, რომლითაც ხელოვნურ ინტელექტს კომპანიის დახმარება შეუძლია კლიენტებთან ურთიერთობის გაუმჯობესებაში ხელოვნურ ინტელექტს გაყიდვების გაუმჯობესება, მომხმარებელთა მომსახურების ხარისხის გაზრდა და მათი გადინების შემცირება შეუძლია. სტარტაპები ხელოვნური ინტელექტის მეშვეობით სტაბილურსა და გაცილებით მომგებიან მომავალს შეიქმნიან
By ვინს ლინჩი •
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
სამყაროში, სადაც ტექნოლოგიები სწრაფად იცვლება, კომპანიებისთვის არც ისე მარტივი უნდა იყოს მომხმარებელთა შეცვლილი მოთხოვნების ფეხის აწყობა. თუნდაც ის განვიხილოთ, თუ როგორ ურთიერთობენ მომხმარებლები კომპანიებთან. Drift-ის ბოლო გამოკვლევის თანახმად, პროდუქციის შეძენისას ისინი უკვე რეალურ დროში ამჯობინებენ ურთიერთობას. ეს კი იმას ნიშნავს, რომ ინტერნეტმაღაზია უკვე აღარ არის საკმარისი.
სტარტაპებისთვის, რომლებიც ერთგული კლიენტების ბაზის გაზრდას ცდილობენ, შესაძლოა სტრესულიც კი იყოს ფაქტი, რომ მომხმარებლის მოთხოვნები დაუყოვნებლივ უნდა დააკმაყოფილონ; უფრო ზუსტად რომ ვთქვათ, ზოგჯერ ეს თითქმის შეუძლებელიცაა. ანტრეპრენერებს, რომელთა პერსონალი მცირეა, ყოველი კლიენტის მოთხოვნის წინასწარ განსაზღვრისა და შესრულების შესაძლებლობა რეალური დროის რეჟიმში ნამდვილად არ ექნებათ.
ხელოვნური ინტელექტისა და მანქანური სწავლების გამოჩენის შემდეგ, ტრადიციულ ბიზნესში ყველაფერი იცვლება. დიალოგის ტიპის ხელოვნურმა ინტელექტმა მომხმარებლისა და კომპანიებისთვის საკომუნიკაციო სივრცე გაცილებით მოქნილი გახადა, რადგან მომხმარებლებს შედეგებს მყისიერად სთავაზობს და ამავე დროს, კომპანიებს თითოეულ მომხმარებელთან უმარტივებს ურთიერთობას.
Dish Network-მა უკვე უჩვენა, რომ ხელოვნურ ინტელექტს ამ თანამედროვე სივრცეში წარმატებით შეუძლია ორიენტირება. კომპანიის თქმით, კლიენტები ვირტუალურ აგენტებთანაც ისევე აფასებენ ურთიერთობას, როგორც თავიანთ კოლეგებთან და ზოგჯერ მეტადაც კი.
მართალია, კომპანიები უკვე ერთვებიან ხელოვნური ინტელექტის თამაშში, მაგრამ არც ისე ინტენსიურად, როგორც უნდა იყოს. McKinsey & Co.-ს ანგარიშის მიხედვით, ხელოვნური ინტელექტი ორგანიზაციის საქმიანობის სხვადასხვა სფეროში კომპანიების მხოლოდ 21 პროცენტს აქვს დანერგილი და მისი გამოყენება თუ კონკურენტული უპირატესობის მოპოვება მეტმა სტარტაპმა უნდა სცადოს.
როგორ გააუმჯობესებს თქვენს ბიზნეს ხელოვნური ინტელექტი
ანტრეპრენერები გვერდიდან არ უნდა აკვირდებოდნენ მოვლენებს, როდესაც ხელოვნური ინტელექტის დანერგვაზე მიდგება საქმე, წინასწარ უნდა გამოიჩინონ აქტიურობა. გაეცანით ხელოვნური ინტელექტის გამოყენების სამ გზას, რომელსაც თქვენი ბიზნესის შეცვლა შეუძლია:
1. დაუყოვნებელი პასუხი მომხმარებელს
მომხმარებელთა უმრავლესობისთვის უზომოდ მნიშვნელოვანია შეკითხვებსა და მოთხოვნებზე სწრაფი გამოხმაურება კომპანიის მხრიდან. HubSpot-ის ბოლო კვლევის თანახმად, მომხმარებელთა 90 პროცენტს მოთხოვნის პასუხად დაუყოვნებელი რეაგირება „მნიშვნელოვნად" ან „ძალიან მნიშვნელოვნად" მიაჩნია, ხოლო 82 პროცენტი ზუსტად ამავე აზრისაა გაყიდვებსა და მარკეტინგულ შეკითხვებთან დაკავშირებულ მოთხოვნებზე.
დიდი ხნის განმავლობაში კომპანიებისთვის საკმაოდ რთული იყო ყველა მომხმარებლის შეკითხვაზე პასუხის დაუყოვნებლივ გაცემა. ვითარებას ხელოვნური ინტელექტი და ავტომატიზაცია ცვლის. ზოგად შეკითხვებზე პასუხის გაცემა უკვე ავტომატიზაციითაა შესაძლებელი, ამის გაკეთება მომხმარებლის მომსახურების სამსახურის წარმომადგენლებს აღარ მოუწევთ და გაცილებით რთულ შეკითხვებზე შეძლებენ ყურადღების გამახვილებას.
მსგავსი სტატია: ხელოვნური ინტელექტის ადამიანური ბუნება და ციფრული უკვდავება
2016 წელს, ინტერნეტსივრცეში Patrón-ის Echo გამოჩნდა, რომელმაც რეცეპტების გაზიარებაც შეძლო მომხმარებელთათვის და ტეკილასთან დაკავშირებული სახალისო ფაქტებისაც. ამ ერთი შეხედვით არაფრით გამორჩეულ ინსტრუმენტს 36,000 მომხმარებელი უკვე ჰყავს და ყოველთვიურად 7,000 მოთხოვნას იღებს. კლიენტებს ასეთი სწრაფი ურთიერთობები მოსწონთ.
კომპანიებმა დიდი ყურადღება უნდა გაამახვილონ გზავნილების გაცვლის ინტერნეტრობოტების განვითარებაზე აპლიკაციებისთვის, როგორიცაა Facebook Messenger და iMessage; და გაფართოებებზე სახლის სმარტდინამიკებისთვის. Deloitte-ის მიხედვით, სმარტდინამიკები − Google Home და Amazon Echo წელს სავარაუდოდ $7 მილიარდ შემოსავალს მოიტანენ, ხოლო კომპანიები, რომლებიც მათ თავიანთი ინტერესის შესაბამისად გამოიყენებენ, მომხმარებლის მოთხოვნებს უკეთ დააკმაყოფილებენ.
2. დაადგინეთ, როგორ გრძნობს თავს მომხმარებელი
Gartner-ის მიხედვით, მომხმარებელთან ურთიერთობის მართვასთან, კორპორაციულ პროგრამულ უზრუნველყოფასთან დაკავშირებული ყველაზე დიდი დანახარჯებია დაკავშირებული. ყველაზე ძვირადღირებული, „ღრუბლის" გაყიდვების პროგრამული უზრუნველყოფაა. ეს ბუნებრივიცაა, რადგან გაყიდვებისა და კლიენტის მომსახურების სამსახური წარმატებული კომპანიის ქვაკუთხედს წარმოადგენს.
თუმცა, ეს იმასაც ნიშნავს, რომ ამ ხარჯების მაქსიმალური უკუგება სასიცოცხლოდ მნიშვნელოვანია. მონაცემების შეგროვება გაყიდვებსა და მომხმარებელზე საკმარისი უკვე აღარ არის. ხელოვნური ინტელექტის დახმარებით, ამ მონაცემების გაანალიზებაც შეიძლება და გაყიდვების გაცილებით ზუსტი გეგმების დასახვაც, რომლის განახლება რეალური დროის რეჟიმში მოხდება. ხელოვნური ინტელექტის დანერგვით, ზოგადი მდგომარეობაც გამოჩნდება და ისიც, თუ როგორ გრძნობს თავს ყოველი მომხმარებელი.
განწყობის ანალიზს შეუძლია მომხმარებელი გაცილებით ბედნიერი გახადოს და უკმაყოფილო კლიენტის გულიც კი მოიგოს. იმის გაგებამ, თუ როგორ გრძნობს თავს მომხმარებელი, შესაძლოა გაყიდვებიც გაზარდოს, კლიენტების მომსახურების ხარისხიც გააუმჯობესოს და წლიური ბიზნესგეგმაც კი შეცვალოს.
კომპანიები ადამიანების ემოციების შესაფასებლად უკვე ხელოვნურ ინტელექტს იყენებენ. Amazon Alexa-ს გუნდი მხოლოდ მომხმარებლის ხმის ბგერებზე დაყრდნობით, მათი განწყობის განსაზღვრაზე მუშაობს, ხოლო კომპანია Affectiva კი ემოციების გასაანალიზებლად სახის გამომეტყველებასა და ხმას სწავლობს.
3. ენობრივი ბარიერების გადალახვა
ხშირად ენა კომპანიებისა და განსაკუთრებით, მცირე ზომის სტარტაპებისთვის ყველაზე ძვირადღირებული და გადაულახავი ბარიერია. ამ ბარიერის გადალახვის ძალა ხელოვნურ ინტელექტს შესწევს. თუნდაც MIT-ის კვლევა განვიხილოთ: როდესაც eBay-მ 2014 წელს ხელოვნურ ინტელექტზე დამყარებული ინსტრუმენტი წარადგინა, რომელიც დასახელებებსა და საძიებო შეკითხვებს თარგმნიდა, შეერთებულ შტატებში გაყიდვები 10.9 პროცენტით გაიზარდა იმ ქვეყნებიდან, რომლებსაც ამ ინსტრუმენტის გამოყენება შეეძლოთ. ეს სტატისტიკა განსაკუთრებით იმითაა აღსანიშნავი, რომ eBay-ის თარგმანის ინსტრუმენტი ჰქონდა, მაგრამ მის დასახმარებლად ხელოვნური ინტელექტი არ გააჩნდა.
კომპანიებისთვის ბევრს შეცვლის ენობრივი ბარიერის გადალახვა − გაცილებით მეტი მომხმარებლის მოზიდვას შეძლებენ. ისეთი ცნობილი კომპანიები, როგორებიცაა Microsoft და Google მომხმარებელს უკვე სთავაზობენ ხელოვნურ ინტელექტზე დამყარებულ ავტომატურ თარგმანს. მცირე კომპანიები კი, როგორიცაა მაგალითად DeepL, ზოგიერთ შემთხვევებში Google-საც კი სჯობნიან. ხელოვნური ინტელექტისა და მანქანური სწავლების მეშვეობით ყოველ კომპანიას აქვს მსოფლიოს ყველა ქვეყანასთან ურთიერთობის შესაძლებლობა.
მსგავსი სტატია: ადამიანური ინტელექტის ხელოვნური ალტერნატივა
ხელოვნურ ინტელექტთან დაკავშირებულ ყველა ამ უპირატესობას ერთი რამ აქვს საერთო − კომპანიის შემოსავლების მნიშვნელოვანი გაუმჯობესება შეუძლია. ხელოვნურ ინტელექტში ინვესტირება უკვე აუცილებლობაა, მაგრამ ისეთი ნაბიჯია, რომელიც ინვესტიციების მაქსიმალურ უკუგებას განაპირობებს. ხელოვნური ინტელექტის ძალა უკეთესი გაყიდვები, მომსახურების ხარისხი და როგორც მომხმარებლის, ისე თანამშრომლების დენადობის შემცირებაა. ხელოვნური ინტელექტის გამოყენებით, სტარტაპებს გაცილებით სტაბილური და მომგებიანი მომავალი ელოდებათ.
