იფიქრე და იმოქმედე ჩემპიონივით!

თუ ფიქრობთ, რომ თქვენც შეგიძლიათ გახდეთ თქვენი საქმის ჩემპიონი, შეხედეთ საკუთარ საქმეს, როგორც სპორტს
იფიქრე და იმოქმედე ჩემპიონივით!
ფოტო: ალექსეი სეროვი
3 min read
Entrepreneur-ის კონტრიბუტორები საავტორო სტატიებში გამოხატავენ მათ პირად მოსაზრებებს.

You're reading Entrepreneur Georgia, an international franchise of Entrepreneur Media.

ოქტომბერში ტაილანდში გამართულ მსოფლიო ჩემპიონატზე ტიტულოვანმა ქართველმა ძალოსანმა ლაშა ტალახაძემ მორიგი რეკორდი დაამყარა – 484 კილოგრამი ორჭიდის ჯამში (ატაცი – 220 კგ, აკვრა – 264).

მისი მორიგი წარმატების ეიფორია ჯერ გადასულიც არ იყო, როცა ჩემპიონმა ინტერვიუში ასეთი რამ თქვა:

„თუ 500 კილოგრამი ავწიე, ნახევარ ტონაზე აღარ გავჩერდები და კიდევ მეტის აწევის სურვილი გამიჩნდება“!

სწორედ ამ ფრაზამ გადამაწყვეტინა, ჩემი მორიგი სარედაქციო სტატია დამეთმო თემისთვის, რომელზეც დიდი ხანია ვფიქრობ, თუმცა ლაშას ინტერვიუმ ამჯერად გადადების საბაბი აღარ დამიტოვა.

მიგიქცევიათ თუ არა ყურადღება, როგორ ფიქრობენ, როგორ აზროვნებენ ჩემპიონები და რა შეიძლება ვისწავლოთ მათგან, რაც ბიზნესშიც და ცხოვრებაშიც გამოგვადგება?

ამ თემაზე, როგორც უკვე გითხარით, ბოლო დროს ბევრს ვფიქრობ, ვკითხულობ და ჩემპიონებისთვის დამახასიათებელი მთავარი თვისება, რაც უკლებლივ ყველას ახასიათებს, მოკლედ ასე შემიძლია ჩამოვაყალიბო – ჩემპიონი არასოდეს კმაყოფილდება მიღწეულით და მუდმივად ცდილობს გააუმჯობესოს შედეგი, რისთვისაც აქვს მკაფიოდ ჩამოყალიბებული მიზანი და ამ მიზნისკენ მიმავალი ყველა ნაბიჯი გათვლილი და კარგად გააზრებულია.

და კიდევ მთავარი – მიუხედავად იმისა, რომ ფიზიკური მონაცემები ძალიან მნიშვნელოვანია, გადამწყვეტი ფაქტორი მაინც მენტალურია – ჩემპიონი ჯერ გონებაში იბადება!

ამიტომაც ვფიქრობ, რომ ჩემპიონის აზროვნება, ჩემპიონის ფსიქოლოგია გადამწყვეტია ყველა იმ ადამიანისთვის, ვისაც სურს ყველაზე მაღალი მწვერვალების დაპყრობა ბიზნესსა და თუ ნებისმიერ სხვა სფეროში; ვისაც სურს, მუდმივად და თანაც დიდი დისტანციით უსწრებდეს კონკურენტებს.

ასეა! ბიზნესისა და სპორტის არენას ჩემპიონის აზროვნება აერთიანებს!

მოვუსმინოთ ლაშა ტალახაძეს, რომელმაც ეს სიტყვები ოქტომბერში, მორიგი მსოფლიო რეკორდის დამყარების შემდეგ „კვირის პალიტრის“ ჟურნალისტს უთხრა:

„ორჭიდის ჯამში 500 კილოგრამი ყველასთვის საოცნებო მაჩვენებელია, მით უმეტეს, რომ ძალოსნობის ისტორიაში 472 იყო საუკეთესო შედეგი, რაც უკვე 12 კილოგრამით გავაუმჯობესეთ და მჯერა, რომ უფლის წყალობით მეტს შევძლებთ! მთავარია, ჯანმრთელად ვიყო და აუცილებლად ავალთ საოცნებო მაჩვენებლამდე“.

როგორც ვხედავთ, ლაშა ტალახაძეს მიღწეული შედეგი არ აკმაყოფილებს და მიუხედავად სენსაციური – 484-კილოგრამიანი რეკორდისა, რაც სხვისთვის შესაძლოა აქამდეც წარმოუდგენელი შედეგი იყო, ის უკვე 500 კილოგრამზე და კიდევ უფრო მეტზეც ფიქრობს!

ის, ისევე როგორც სხვა ჩემპიონები, მეოცნებეა, მაგრამ მისი ოცნება ყოველთვის ხორციელდება, რადგან ის არასოდეს დუნდება, არასოდეს კმაყოფილდება მიღწეულით და მაქსიმუმის მისაღწევად თავდაუზოგავად შრომობს!

კვლავ მას მოვუსმინოთ:

„ყოველი ტურნირის შემდეგ თავიდან ვიწყებ ფიქრს, რომ კიდევ ბევრი მწვერვალია დასაპყრობი. ძალოსნობა სპორტის ისეთი სახეობაა, მოდუნების საშუალებას არ გაძლევს – მცირე უყურადღებობა, იმედგაცრუება ან მეტოქეების შეუფასებლობა საკმარისია, რათა ძალიან დაშორდე კონდიციას, რომლისთვისაც წლების განმავლობაში იბრძოდი. ამიტომ მუდამ მობილიზებული ვარ მაქსიმუმის გასაკეთებლად“!

თუ ფიქრობთ, რომ თქვენც შეგიძლიათ გახდეთ თქვენი საქმის ჩემპიონი, შეხედეთ საკუთარ საქმეს, როგორც სპორტს, აქციეთ თქვენი პროფესიული საქმიანობა სპორტულ არენად, არასოდეს დაკმაყოფილდეთ მიღწეული შედეგით, არ დანებდეთ, მუდმივად ისწრაფეთ უკეთესისკენ, დაისახეთ მიზნები და მიაღწიეთ მათ, შემდეგ კვლავ ახალი მიზნებისკენ აიღეთ გეზი და ასე, შეუჩერებლად, მიზანმიმართულად, მობილიზებულად და კონცენტრირებულად იმოძრავეთ ახალი და ახალი რეკორდებისკენ – სპორტშიც, ბიზნესშიც, ცხოვრებაშიც!

ასეთია ჩემპიონის გზა. შეუდექი მას! იფიქრე და იმოქმედე ჩემპიონივით!

მადლობა, ჩემპიონო!

 

გიორგი შარაშიძე

მთავარი რედაქტორი

editor@entrepreneur.ge

More from Entrepreneur

Get heaping discounts to books you love delivered straight to your inbox. We’ll feature a different book each week and share exclusive deals you won’t find anywhere else.
Jumpstart Your Business. Entrepreneur Insider is your all-access pass to the skills, experts, and network you need to get your business off the ground—or take it to the next level.
Are you paying too much for business insurance? Do you have critical gaps in your coverage? Trust Entrepreneur to help you find out.

Latest on Entrepreneur