ილონ მასკის SpaceX-ი Dogecoin-ს მთვარის მისიისთვის ანგარიშსწორების საშუალებად გამოიყენებს
By არჩილ გელაშვილი •
You're reading Entrepreneur Georgia, an international franchise of Entrepreneur Media.
ილონ მასკის კოსმოსური რაკეტების მწარმოებელი ცნობილი კომპანია SpaceX, 2022 წელს მთვარის მიმართულებით ექსპედიციას აანონსებს. ამ მისიაში მონაწილეობის მისაღებად კი, ე.წ. „მიმების" კრიპტოვალუტა Dogecoin-ს ანგარიშსწორების საშუალებად გამოიყენებს.
კომპანია Geometric Energy Corp.-მა, რომელიც ინტელექტუალური საკუთრების დაცვით, წარმოებითა და ლოგისტიკითაა დაკავებული და განახლებადი ენერგიის წყაროებზე მუშაობს, 9 მაისს განაცხადა, რომ ილონ მასკის SpaceX-თან ხელშეკრულება გააფორმა. შეთანხმების მიხედვით, Geometric, კოსმოსის კვლევებისათვის, მთვარის მისიას თავის მინითანამგზავრს „გააყოლებს", რომელიც 40 კილოგრამს იწონის და ამ მომსახურების სანაცვლოდ, SpaceX-ს Dogecoin-ით გადაუხდის. მისიის სახელწოდებაა Doge-1 to the Moon და იგი რაკეტა Falcon-9-ის მეშვეობით ჩატარდება. ექსპედიცია 2022 წლის პირველ კვარტალშია დაგეგმილი.
მასკი „ტვიტერის" საკუთარ ანგარიშზე წერს: „SpaceX-ი თანამგზავრ Doge-1-ს მთვარისკენ მომავალ წელს გაუშვებს. მისიის საფასური გადახდილია Dogecoin-ით. ესაა პირველი კრიპტოვალუტა კოსმოსში; პირველი მიმი კოსმოსში. To the Mooon!"
Dogecoin − კრიპტოვალუტა, რომელიც 2013 წელს შეიქმნა, განსაკუთრებით პოპულარული ბოლო პერიოდში მისი ფასის მკვეთრი ზრდის გამო გახდა. CoinGecko-ს მონაცემით, ბოლო ერთი წლის განმავლობაში, ამ ციფრული ვალუტის ღირებულება 20 000%-ით გაიზარდა. მასზე მოთხოვნის ზრდაში გამორჩეული წვლილი, სხვა ცნობილ ადამიანებთან ერთად, თავისი სახალისო და თამამი „ტვიტებისა" და „მიმების" წყალობით, ილონ მასკმაც შეიტანა.
ანალიტიკოსების აზრით, DogeCoin-ის მიმართ ბოლო კვირებში განსაკუთრებული დაინტერესება, მასკის SNL-შოუში მოსალოდნელ გამოჩენას უკავშირდებოდა. ექსპერტთა ნაწილი მიიჩნევს, რომ მას კიდევ შეუძლია კრიპტოვალუტის ფასის გაზრდა, თუკი ტელევიზიებსა და სოციალურ ქსელებში Doge-ის პოპულარიზებას განაგრძობს. ფაქტია, ილონ მასკის გამოხმაურებები მკვეთრად მოქმედებს ამ ციფრული ვალუტის ფასზე. სულ ცოტა ხნის წინ, Dogecoin-ის გარშემო წარმოქმნილ ასეთ ინტერესს მან „აურზაური" უწოდა, რამაც მალევე, Doge-ი 25%-ზე მეტად გააუფასურა და მისი ფასი 0,43 ცენტამდე დააგდო.
Geometric ჯერჯერობით არ ასაჯაროებს, თუ რამდენი Dogecoin გადაუხადა SpaceX-ს ამ შეთანხმების სანაცვლოდ.
„ამ რანგის შეთანხმებით, Geometric Energy Corp.-მა და SpaceX-მა გაამყარეს Doge-ის პოზიციები და კოსმოსურ სფეროში, განსაკუთრებით კი მთვარესთან დაკავშირებულ ექსპედიციებში, იგი ანგარიშსწორების ერთეულად აქციეს", − სამუელ რეიდი, Geometric Energy-ის აღმასრულებელი დირექტორი.
უამრავი ექსპერტი გვაფრთხილებს, რომ კრიპტოვალუტები არასანდო და მაღალი რისკის შემცველი აქტივია, რომელიც ნებისმიერ დროს შეიძლება გაუფასურდეს. ანალიტიკოსთა ნაწილი კი, განსაკუთრებული კატეგორიულობით გამოირჩევა და Dogecoin-ს, როგორც ციფრულ ვალუტას, თაღლითობად და სპეკულაციად მიიჩნევს.
